VOV4.K’ho- Tam lơh jai pha bơh ngai 2 tus ngai 5/8/1964 là bơta pơn iờ să ngan bơh gĭt nđờ rơnàng Kuang bàng, cau ling Quân chủng ling dà lềng dê. Là mpồl ling tus bal tam lơh jai pha dơ̆ sơnrờp pơgap mờ do 57 nam, ală rơnàng Kuang bàng, cau ling Lữ đoàn 170 Tiah 1 ling dà lềng neh ờ ngòt bơta bòl glar kal ke, tam klăc bal bơt bơtàu Lữ đoàn sùm dờng pràn gơ gơs là mpồl ling tờm ngan sền gàr gơnoar tờm dà lềng tiah đah Tô bơh Dà lơgar dê.  

Ală ngai do, bulah trồ tiah gơtìp gơrềng tài bơh trồ tơngai duh mờ bơta kòp Covid-19, Kuang bàng, cau ling Hải đội 135, Lữ đoàn 170 kung gam tryang tryồng ngan pơlam tàp jơnau tơrgùm bal tam lơh mpồl ling sền gàr tiah nhàr lơgar dà lềng tàm anih ơhò ơm. Lơh pôs đồng tàm càr Quảng Ninh, Lữ đoàn 170, lơh jat kơnòl broă rcang sơndră kòp, mơkung gàr sùm mpồl ling, rơndeh rơndồ măy mok rcang lài tam lơh. 100% nă Kuang bàng, cau ling bơh Lữ đoàn kung gam lơh jat niam ngan ală broă lơh rcang sơndră kòp, ngan là jơnau sồr “5K” bơh Bộ Y tế dê. Bơdìh mờ broă rcang lài tơl làm dà sơnơm lơh kloh khuẩn, ƀồm sơnơm lơh kloh khuẩn, pơn chèu glòm muh mat mờ was đo să jan sùm, sồr ală anih lơh broă, mpồl lơh broă kấp hơđơm tam pà bal, ai Kuang bàng, cau ling gơ gơs ală mpồl, mpồl dềt nàng gàr niam broă ai ơm yah ngài tŭ pơlam tàp. Bơh ling tàm anih ơnhò ơm do dê, uă dơ̆ ơhò bơh Lữ đoàn 170 lòt gùng, lơh jat broă tam lơh jai pha tơl kơnòl broă geh jàu. Lơh jat niam bơhiàn bơh ală rơnàng bèp bi dê lòt lài, rơnàng kuang bàng, cau ling bơh Lữ đoàn ngai do dê sùm pơlam tàp, tơnguh uă bơta khin cha kơ̆ dơn chính trị; pơn jat tai pơlam tàp nàng kờñ tơnguh uă bơta chài ngui măy mok, bơta chài tam lơh mờ ală bơta pràn rcang lài tam lơh. “Chờ hờp, pơn iờ să geh là Kuang bàng, cau ling bơh mpồl ling tus bal tam lơh jai pha dơ̆ sơnrờp” hơ̆ là jơnau kơlôi sơnơng bơh jơh ală Kuang bàng, cau ling Hải đội 135, Lữ đoàn 170 dê.

Cuh mền dà tam lơh 53-V1 nam 2019 tàm Lữ đoàn 170

Thượng úy Trần Văn Cảnh, Kuang atbồ gah ơhò phàu kơnong 354, Hải đội 135 pà gĭt: ală jơnau bơsram, ală bơhiàn kuơ màng bơh bèp bi dê là ală jơnau yal bơto bơtê tàm ală tŭ jiơ pơrjum bơh ơhò dê nàng tơngkah ală Kuang bàng, cau ling pal sùm tơnguh uă bơta gĭt wă, nùs nhơm nàng lơh sir tơl kơnòl broă tàm khat dùl bơta lơi.

Là rơnàng kơnòm să geh kis tàm rài ring lơngai mờ dờp lòng ală cồng nha bơh bơta chơ̆t phi să, dà kơl hề dờng màng bơh ală rơnàng bèp di dê lòt lài, ngan là broă lơh tàm Lữ đoàn geh ală ơhò là mpồl ling bơh sơnrờp tam lơh jai pha dơ̆ sơn rờp bơh ling dà lềng làng bol Việt Nam dê, să tờm añ sền gŏ chờ hờp ngan mờ pơn iờ să ngan mơ kung gŏ loh kơnòl bơh he dê.

Thiếu tá Phạm Tố Chinh, Chính trị viên Hải đội 135 pà gĭt: ală jơnau bơsram bơhiàn yau tàm dơ̆ tam lơh jai pha dơ̆ sơnrờp bơh ngai 2 tus ngai 5/8/1964 neh pơn jờng, lơh geh bơta pin dờn mờ bơt bơtàu nùs nhơm jơh nùs lơh ngan ai Kuang bàng, cau ling Hải đội dê ngai do rcang lài dờp kong phi să nàng sền gàr gơnoar tờm dà lềng, ƀồt bơlào bơh dà lơgar dê.

Nàng đòm jat nùs nhơm bồ tơngoh kung bè bơta pràn jak bơh ală kuang bàng, cau ling dê lài ngan là bơto bơtê bồ tơngoh, bơta gĭt wă uă ngan bè kơnòl broă, ală bơta kal ke tàm tŭ lơh jat kơnòl broă, bơh hơ̆ sền gĭt niam kơnòl broă geh jàu, lơh geh bơta niam, bơta ƀuơn ƀoài ngan rlau jơh nàng ală cau ling in đòm jat niam jơh ală bơta pràn, lơh jat nùs nhơm lơh is, bơto bơsram mờ ngan là bơto bơtê tàm tŭ pơlam tàp, tŭ lơi kung rcang lài tam lơh kung bè bơsram tàm mpồl, cribơyai bal bơta mờng chài bơh rơnàng bèp bi dê lòt lài đòm jat niam nùs nhơm geh kơnòl bơh he dê.

Kuang bàng, cau ling Lữ đoàn 170 Tiah 1 Ling dà lềng sền gàr niam ngai măy mok

Ală nam pa do, tàm broă bơyai lơh bơh Hải đội 135 dê geh tai uă ơhò mờ rcang lài phan bơna măy mok phàu crong tàm ơhò pa ngan. Lòt sền, sền gròi broă pơlam tàp, rcang lài tam lơh mờ gàr niam bơta chài, là broă lơh sùm bơh Kuang đơng lam bồ, gah đơng lam ală kấp tàm Lữ đoàn 170 dê, nàng kờñ wèt tus jơnau kờñ uă ngan rlau jơh: kòn bơnus mờ phàu crong rcang lài bơta chài ngui măy mok sùm rcang lài lơh sir jak ngan tơl kơnòl broă geh jàu. Thượng tá Tô Hồng Quân, Chính ủy Lữ đoàn 170 , Tiah 1 Ling dà lềng đơs: Kuang bàng, cau ling Lữ đoàn 170 khin cha jak chài sùm cèng tàm să jan he dê nùs nhơm kơ̆ kơl jap sền gàr gơnoar tờm ù tiah kìng crŭ gơn rơh bơh dà lơgar dê.

Bơsram, lơh broă tàm mpồl geh uă bơhiàn cau ling dê kung pơñ iờ să ngan, Lữ đoàn kung lơh pràn ai mpồl ling in ngui mờng kuèng phan bơna măy mok, tơnguh uă nùs nhơm sơr lèt gan tơl bơta kal ke, bơt bơtàu nùs nhơm kơ̆ dơn chính trị kơ̆ kơljap.

 Bơh dơ̆ tam lơh jai pha dơ̆ sơnrờp nam yau do dê, ală rơnàng Kuang bàng, cau ling ngai do neh geh “bơtơl tai bơta kơ̆ nùs”, tơnguh bơta pràn dờng ngan nàng bơt bơtàu gơs dùl Lữ đoàn 170 kơ̆ kơl jap pràn kơldang taidi pal là mpồl ling khin cha jak chài mpồl ling phàu crong làng bol dê tàm nhàr lơgar dà lềng, bồt bơlào tiah đah Tô dà lơgar dê.

Jat VOV1- Cau mblàng K’Hạnh