VOV4.K’ho- Ngai dunia lơh broă ngai 01 nhai 5 sơn đờm geh bơh ƀòn dờng lơh sa mờ măi mŏk dờng Chicago, lơgar Mỹ. Hơ̆ là nam 1886, tàm ƀòn dờng lơh sa mờ măi mŏk dờng Chicago, Pơrjum dờng mpồl tam klăc cau lơh broă lơgar Mỹ ring bal nghị quyết cih loh: “Bơh ngai 01 nhai 5 nam 1886, ngai lơh broă bơh jơh ală công nhân dê là 8 jơ”. Bơh tài ngai 01 nhai 5 geh rơwah tài bơh tàm ngai do, broă lơh bal pa bơh cau chài lơh broă mờ cau tờm geh kĭ hơ bal. Cau tờm ngui cau lơh broă tư bản gơtùi gĭt lài kơrnoăt bơh công nhân mờ ờ gơtùi joì jơnau nàng pleh. Mơya, ngai 01 nhai 5 nam 1886, tài jơnau kờñ bơh công nhân ờ geh di pal tơl, den tàng công nhân tàm gùt lơgar Mỹ neh tus bal dră wơl ơm ờ lơh broă nàng geh jơnau bơrklơn tus mờ cau tờm ngui cau lơh broă lơh jăt jơnau kờñ bơh công nhân dê. Lài ngan là dơ̆ lĭk dră tàm ƀòn dờng Chicago. Geh di pơgăp 40 rơbô nă cau ờ tus lơh broă tàm hìu măi. Ală công nhân do bơyai lơh lĭk dră tàm ƀòn dờng mờ jơnau cih “Bơh ngai do ờ geh cau lơh broă lơi lơh broă uă ir 8 jơ tàm 1 ngai! Pal lơh jăt 8 jơ lơh broă, 8 jơ ơm rơlô, 8 jơ chờ nhơl!” Dơ̆ lĭk dră hòi jà bal ngai sơlơ gal cau tus bal.

Ngai 01/5 geh sền là ngai gờm chờ jai pha neh lơh geh, đơs bơta lơh ngan lơh gơs kơnòl broă pa mờ ai tơnggŏ nùs nhơm tam klac bal mờ ală cau lơh broă ală lơgar ndai. Ngai 1/5 kung là ngai jờng rơ ai mpồl cau lơh broă, tam lơh ai bơta ring lơngai, làng bol lơh tờm, gơguh jak mpồl bơtiàn in. Tŭ do, ngai dunia lơh broă ngai 1/5 là ngai chờ bơh rơnàng công nhân mờ làng bol lơh broă lơgar he, ngai tam klac rơnàng công nhân mờ ală jơi bơtiàn kòn cau gơtìp rồn bơklơn tàm dunia tàm dơ̆ tam lơh tài ring lơngai, lơngap lơngai is jơi bơtiàn, làng bol lơh tờm mờ gơguh jak mpồl bơtiàn.

Cau mblàng Ndong Brawl mờ K’Duẩn