VOV4.K’ho - Đơs tờm tàm pơrjum drim òr (25/10) bè broă rơcang sơndră mờ me mrềt rơcang pràn gơs mìu càl dờng, ồng Trần Quang Hoài, Phó kuang atbồ Mpồl đơng lam Dà lơgar bè broă rơcang sơndră mờ rềs àr bơh trồ tiah sồr ală càr, ƀòn dờng mhar tơmù ală hoàc huơr bơh mìu dà tih dà cò tàm tơngai pa do mờ bañ lời ơhò plung tàm dà lềng lơh broă tàm tiah ngòt rơngơ̆t bơh mìu càl dờng.

Pơn jăt tai yal lài bè mìu sơr bơh càr Thừa Thiên Huế tus mờ càr Khánh Hoà kung bè mìu sơr tàm ală tiah ndai, càl pồt pràn, kơnàs còng, mìu piar, càl pồt pràn tàm càr Ninh Thuận, Bình Thuận, Tây Nguyên mờ đah jum dà lơgar, ală kuang bàng sồr ală càr, ƀòn dờng pơn jăt tai mhar tơmù hoàc huơr bơh mìu dà tih dà cò tàm tơngai pa do, tàm hơ̆ uă ngan là broă gơtìp tơrlah ù tàm ờ uă gơl gùng lòt nàng gờñ ai rơndeh lòt mờ gùng rơndeh ồs đah tô-đah jum geh lòt wơl. Gơwèt mờ me mrềt rơcang pràn gơs mìu càl dờng, pal rơcang yal di tŭ ai ală cấp gơnoar atbồ bal mờ làng bol in rơcang pleh, tàm hơ̆ uă ngan là ală ơhò, plung gam lơh broă tàm tiah gơtìp ngòt rơngơ̆t. Ală càr, ƀòn dờng pal sền gròi nàng geh tơl niam ờ do ờ dă ai làng bol in tàm ală tiah gơtìp gơbam dà, pleh mờ bơta mìu dà tih dà cò jŏ tơngai lơh geh nùs nhơm ờ rơcang lài gơwèt mờ làng bol.

Cau mblàng Ndong Brawl