VOV4.K’ho- Cơldŭ lơh broă Kuang ătbồ lơgar Mỹ dê pa yal, mò Kamala Harris- Phó Kuang ătbồ lơgar Mỹ geh lòt còp lơgar Việt Nam mờ Singapore tàm nhai 8 nam do. Dơ̆ lòt còp nàng kờñ cribơyai mờ ală kuang đơng lam bồ bơh 2 lơgar do dê bè dùl ròt ală broă sền gròi bal, tàm hơ̆ geh bal bơta lơngăp lơngai tàm kơnhoàl ù tiah do, broă lơh wơl bơh jơh gùt plai ù dê tềng đăp kòp dờng Covid-19, tam gơl trồ tiah mờ ală broă lơh ngan bal nàng kờñ dong kờl rơndăp tăp sèng dunia jăt tàm adat boh lam.

Phó Kuang ătbồ lơgar Mỹ mò Kamala Harris

Dơ̆ lòt còp geh pơgồp bơnah tơnguh bơta gĭt gơ̆p mờ pờ ơnàng lơh broă bal lơh sa bal mờ 2 lơgar lơh broă bal tờm ngan bơh Mỹ dê tàm kơnhoàl ù tiah Ấn Độ Dương- Thái Bình Dương. Dơ̆ lòt còp lơgar Việt Nam bơh ồng Lloyd Austin- Bộ trưởng Bộ Quốc phòng lơgar Mỹ dê neh pơn jăt tai pơgồp bơnah tơnguh tai bơta gĭt gơ̆p lơh bơyô bal, pin dờn đah làng bol mờ Mpồl ling 2 lơgar dê, lam lơh ală tơngume lơh broă bal tàm gah broă lơh sền gàr dà lơgar neh kĭ đah 2 Bộ Quốc phòng mờ jơnau ring bal bơh kuang đơng lam bồ kấp dờng màng 2 lơgar dê, pơgồp bơnah mŭt tàm tơngume Tam klăc lơh broă bal tơl làm Việt Nam mờ Mỹ.

Cau mblàng Lơ Mu K’Yến