VOV4.K’ho- Drim ngai 26/8, tàm Hà Nội, geh bơyai lơh pơrjum dơ̆ 1 Mpồl đơng lam bơt bơtàu rơndap broă lơh “Tơn jơh 15 nam lơh jat Nghị quyết dà lơgar 5, khoá 10 bè pơn jat tai tam gơl pa gùng dà broă lơh đơng lam bơh Đảng dê gơwèt mờ broă lơh bơh ală anih lơh broă Chính trị” yal tàm pơrjum dà lơgar dơ̆ 6, khoá 13. Mò Trương Thị Mai, Kuang atbồ Mpồl rơndap broă lơh dà lơgar dê đơng lam pơrjum.

Mò Trương Thị Mai, Kuang atbồ mpồl đơng lam rơndap broă lơh sồr ală Kuang bàng Mpồl đơng lam pơgồp bal mờ Anih lơh broă thường trực tơngkah, sac rơwah wơl ală tơngume. Jat hơ̆, ală tơngume kờñ tơrgùm wơl ală broă dờng, jrô ơnàng, pleh mờ bơta  tàm rơndap wơl, mơkung geh sồr bàr pe kấp ủy, mpồl Đảng lơh jat jơnau yal tơngume. Rơndap broă lơh geh lơh sir tàm nhai 9 nam 2022. Mơkung tơngkah tai, gam 1 nam tai nàng lam lơh jat, mơya ală broă den uă ngan, den tàng, ală Kuang bàng Mpồl đơng lam kờñ pal kơlôi sơnơng nàng tus bal tă pơgồp bal jơnau đơs bơt bơtàu jơnau yal mờ ală tơngume gơ jat bal mờ gơnoar broă, kơnòl broă bơh kấp ủy, mpồl Đảng mờ ală kuang bàng gam lơh broă.

Cau mblàng K’Hạnh