VOV4.K’ho- Drim ngai 09/7, 580 rbô ding sơnơm vaccine rơcang sơndră kòp Covid-19 bơh AstraZeneca dê jat sră pơrgon blơi bơh Ală mpồl cit sơnơm vaccine VNVC dê neh mù tàm ƀlàng rơndeh par dunia Tân Sơn Nhất.

                                             Sền sơ wì sơnơm vaccine AstraZeneca

Mờ 580 rbô ding sơnơm vaccine bơh VNVC dê là dơ̆ jàu sơnơm vaccine dơ̆ 3 tàm sră pơrgon blơi 30 tơlak ding mờ Kong ti cổ phần vaccine Việt Nam (VNVC) dan blơi lài bơh AstraZeneca dê, tơnơ̆ hơ̆ geh jàu jat bơta ờ geh priă cồng ai Bộ Y tế in. Khà sơnơm vaccine dơ̆ do geh pơn jat tai geh jàu ờ geh priă cồng ai Bộ Y tế in, nàng kờñ di tŭ lam lơh cit sơnơm vaccine ai làng bol in, kuơmàng là ală tiah geh kòp tŭ do. Bơdìh hơ̆ tai, VNVC kung hơ pơrgon lòt bal tàm tŭ tơngai dờp sơnơm vaccine bơh mpồl lơh gơlik sơnơm vaccine AstraZeneca tus tŭ tơngai tàm jàu. Kung tàm drim ngai 09/7, 400 rbô ding sơnơm vaccine bơh lơgar Nhờk dong kờl neh rê tus ƀlàng rơndeh par Tân Sơn Nhất. Do là khà sơnơm vaccine gơ ơm tàm 2 tơlak ding sơnơm vaccine lơgar Nhờk dong kờl ờ tơm wơl ai lơgar Việt Nam in.

Cau mblàng K’Duẩn