VOV4.K’ho- Ngai do 7/7/2021, mờr 1 tơlak nă kơnòm pơrlòng tàm gùt lơgar ngan ngồn mŭt tàm ngai pơrlòng bơh sơnrờp bơh dơ̆ pơrlòng jơh bơsram kấp pe nam 2021 dơ̆ 1, bal mờ 2 môn pơrlòng là Ngữ văn mờ Toán. Ƀùi drim, 7 jiơ 30 phuk, kơnòm pơrlòng geh lơh jơnau pơrlòng môn Ngữ văn, jăt broă lơh kơlôi cih is, tŭ jiơ lơh jơnau pơrlòng jòng 120 phuk. Ƀùi mho, pơrlòng môn Toán, jăt broă lơh trắc nghiệm, tŭ jiơ lơh jơnau pơrlòng jòng 90 phuk. Lài hơ̆ tàm mho ngai 6/7, ală kơnòm pơrlòng neh lòt tus ală anih pơrlòng nàng lơh sră nggal mŭt pơrlòng, lơh jăt broă cih lơh wơl bơta tìs hŭi (dilah geh), iăt yal Kơrnoat pơrlòng, tŭ jiơ pơrlòng.

Tài bơh kòp Covid-19 gơbàn kal ke den tàng jơh ală anih pơrlòng ndrờm neh tàp lơh ală broă lơh rơcăng sơndră kòp rơcăng lài wil tơl sơnơm tơm ba, phan ngui rơcăng sơndră kòp, bè: chèu glòm muh mat, dà ràu goh khuẩn, jơnồr dà mờ tŏp ală sră cih yal bè rơcăng sơndră kòp....Nàng dơ̆ pơrlòng geh lơh niam mờ ờdo ờdă, ồng Nguyễn Hữu Độ- Thứ trưởng Bộ Giáo dục mờ Đào tạo, Kuang ătbồ Mpồl đơng lam kấp dà lơgar dơ̆ pơrlòng jơh bơsram kấp pe nam 2021 tơngkah: ală anih pơrlòng pal mblàng yal tus jơh tơl nă kuang bàng, cau sền pơrlòng tus bal lơh broă sền pơrlòng, kơnòm pơrlòng pal tơnguh uă kơnòl tàm jơh ală ngai pơrlòng nàng kờñ sền gàr ờ gơlik geh ală bơta tìs hŭi lơi pơlai soh.

Test mhar virus Sars CoV-2 ai ală kơnòm pơrlòng tàm Dăk Lăk in

Tàm 2 ngai bơh ngai 5 tus ngai 6/7, Sở Y tế càr Dak Lak neh lơh xét nghiệm test mhar kháng nguyên Sars CoV-2 ai 150 nă cau là cau pơgru sền pơrlòng, cau sề pơrlòng, cau drơng broă tàm dơ̆ pơrlòng mờ xét nghiệm tes mhar ai rlau 500 nă kơnòm pơrlòng tus bal pơrlòng jơh bơsram kấp pe tàm tiah pơrlòng Hìu bơsram kấp pe Lak, thị trấn Liên Sơn, kơnhoàl Lak dê. Do là kơnhoàl geh cau bơtờp kòp Covid-19 geh sền gŏ gơrềng tus tiah kòp tàm ƀòn dờng Hồ Chí Minh mờ gam ai ơm yah ngài sơm kòp. Tus tŭ do, jơh ală mẫu xét nghiệm ndrờm ai cồng nha ờ bơtờp kòp. Mơya, nàng gàr niam ai dơ̆ pơrlòng in geh bơyai lơh ờdo ờdă rcang sơndră kòp, Sở Y tế càr Dak Lak jàu Hìu sơnơm kơnhoàl Lak in pơgồp bal lam lơh jat gàr niam broă lơh rcang sơndră kòp Covid-19 tàm ală tơngai geh bơyai lơh dơ̆ pơrlòng jơh bơsram kấp pe tàm ù tiah do dê.

Cau mblàng Lơ Mu K’Yến mờ K’Hạnh