VOV4.K’ho - Bal mờ kơnòm bơsram gùt lơgar, ngai òr (07/07), rơlao 19 rơbô 800 nă kơnòm pơrlòng tàm càr Dak Lak neh mŭt tàm dơ̆ pơrlòng jơh bơsram cấp 3 nam 2021 (dơ̆ 1).

                                  Kơnòm pơrlòng geh anih nggui niam lài mờ tŭ lơh jơnau pơrlòng

Bŭ lah là 1 tàm ală càr geh cau gơtìp kòp Covid-19 mơya kơnờm mờ broă sền gròi niam kòp gơtờp den tàng kơnòm pơrlòng, cau mè bèp kơnòm pơrlòng mờ ală cau tus bal drơng broă tàm dơ̆ pơrlòng do ndrờm iang nùs, pin dờn tàm dơ̆ pơrlòng geh bơyai lơh ờ do ờ dă, nền nòn, di mờ kơrnoăt geh ai. Tàm anih pơrlòng hìu bơsram cấp 3 Lăk, thị trấn Liên Sơn, kơnhoàl Lăk-do là tiah neh dờp geh 2 nă cau gơtìp mờ kòp Covid-19, jơh ală kơnòm pơrlòng neh geh gròi sền mhar mờ ai geh cồng nha ờ gŏ mờ kòp, den tàng ală kơnòm pơrlòng geh mŭt pơrlòng mờ nùs nhơm iang ngan. Jơh ală kơnòm pơrlòng ndrờm lơh jăt nền nòn broă pơn chèo.

Nàng gàr niam bè bơta ngài, pleh tơrgùm bal gal kơnòm pơrlòng dùl dơ̆ lĕ bal, mpồl duh broă pơrlòng neh tơnguh mpồl lơh sơnơm tus 10 nă cau lơh jăt sùm ală broă gròi sền bơta duh să jan, ƀồm dà rào tê lơh kloh vi khuẩn lài mờ tŭ kơnòm pơrlòng mŭt tàm jơdŭ pơrlòng. Bơdìh mờ broă rơcang niam jơnau ngăc ngar, ală kơnòm pơrlòng neh gĭt lài broă gàr niam bơta pràn kơl dang să jan nàng mŭt tàm kàl pơrlòng.

Cau mblàng Ndong Brawl