VOV4.K’ho- Bơh nhai 7 tus lồi nam do geh êt ngan rlau jơh là 50% cau bơh 18 sơnam rlau hơđang geh cit sơnơm vaccine rơcang sơndră kòp Covid-19. Do là jơnau tơnggit geh Bộ Y tế mờ Bộ Quốc phòng yal tàm dơ̆ pơrjum sơn rờp bơh Mpồl đơng lam lam lơh broă cit sơnơm vaccine rơcang sơndră kòp Covid-19 nam 2021- 2022 geh lơh drim ngai 02/7 tàm Hà Nội. Jat hơ̆, broă cit sơnơm vaccine geh lam lơh bơh nhai 7 nam do tus nhai 4 nam 2022, tàm hơ̆, êt ngan rlau jơh 50% cau bơh 18 sơnam rlau hơđang geh cit sơnơm vaccine tàm nam 2021 mờ tus jơh quý 1 nam 2022 geh rlau 70% khà kờp làng bol geh cit sơnơm vaccine.

Broă lơh cit sơnơm vaccine geh lam lơh tàm gùt lơgar bal mờ mờr 19 rbô anih cit sơnơm dùl bă tiah mờ làm bă tiah. Tàm hơ̆, cit lài ai ală càr, ƀòn dờng gam geh kòp, geh uă anih lơh sa mờ măi mok in. Tàm càr, ƀòn dờng, cit lài ai ală cau tàm tiah gam geh kòp in. Đơs nền do là broă lơh cit sơnơm vaccine dờng ngan rlau jơh bơh lài tus tŭ do, Bộ trưởng Bộ Y tế ồng Nguyễn Thanh Long pà git, Bộ geh pơgồp bal jơh nùs mờ Bộ Quốc phòng mờ ală tiah bơh broă dờp, pơndiang, prap gàr, tam pà sơnơm vaccine, kuơmàng là gàr ờdo ờdă cit sơnơm tàm khà jơnhua ngan rlau jơh.

Cau mblàng K’Duẩn