VOV4.K’ho- Tàm ngai sơnrờp ai cau lòt lơh broă uă ngan gàr niam rơndap tap sèng ờdo ơdă gùng lòt, rơndap tap sèng mpồl bơtiàn tàm dơ̆ ơm rlô 30/4 mờ 1/5, sền gàr dơ̆ tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026, Kảnh sát gùng lòt gùt lơgar neh lòt sền, sền gŏ mờ lơh glài mờr 9 rơbô nă cau lơh tìs rơndap tap sèng, ờdo ờdă gùng lòt; lơh glài mờ priă mờr 10 tơmàn đong. Pal sền gròi ngan là, mpồl lơh broă geh gơnoar neh sền gŏ mờ lơh glài rlau 600 nă cau măy rơndeh tìs mờ broă ñô ơlak, bièr, 5 nă cau lơh tìs jơnau sồr bè ma tuý.

Tàm gah gùng rơndeh ồs, ală mpồl lơh broă gơwèt Kảnh sát gùng lòt neh lam uă mpồl lơh broă lòt sền, sền gĭt bơta lơh broă gàr niam rơndap tap sèng, ờdo ờdă gùng lòt tàm 3 gùng song bal, 5 mpồl rơndeh ồs năc dê; lơh jat niam ală broă lơh rcang sơn dră kòp Covid-19. Tàm drim ngai 16/04 tơn, mpồl lòt sền gùng lòt neh sền gŏ 4 nă cau ngui ma tuý mờ tìs mờ broă ñô ơlak, bièr tàm ngai lơh uă tàm gơl gùng rơndeh ntoat rat Hà Nội- Thái Nguyên. Jat Nghị định sồ 100/2019 bơh Chính phủ dê sồr bè lơh glài cau lơh tìs mờ priă tàm gah gùng lòt ù gờl, gùng rơndeh ồs, broă lơh măy rơndeh mờ tàm să jan geh ngui ma tuý, ală cau măy rơndeh geh lơh glài bơh 30 tus 40 tơlak đong, kŭp sră măy rơndeh bơh 22 tus 24 nhai.

Cau mblàng K’Hạnh