VOV4.K’ho - Tềng đăp mờ bơta kal ke bơh kòp Covid-19 mờ uă cau gơtìp geh gŏ tàm mpồl bơtiàn càr Dăk Lăk, drim òr (27/10) mpồl bác sĩ bơh hìu sơnơm Chợ Rẫy neh tus càr Dăk Lăk nàng dong kờl tam dră mờ kòp Covid-19.

                            Mpồl bác sĩ hìu sơnơm Chợ Rẫy tàm hìu sơnơm tiah Tây Nguyên

Tàm ƀùi drim sơnrờp tŭ tus càr Dăk Lăk, mpồl lơh broă bơh Hìu sơnơm Chợ Rẫy neh geh dơ̆ lơh broă mờ kuang đơng lam mờ mpồl bác sĩ tàm hìu sơnơm tiah Tây Nguyên, tơnơ̆ mờ hơ̆ lòt sền Khoa cấp cứu hồi sức sơndră mờ khih pràn, tàm hìu E-do là tiah rơcang lơh gơs tiah sơm kòp cau kòp Covid-19 cấp độ 2 mờ 3 mờ tiah gam sơm kòp cau kòp Covid-19 cấp độ 3. Tơnơ̆ mờ hơ̆, ală bác sĩ, điều dưỡng bơh hìu sơnơm Chợ Rẫy pơn jăt tai ơm 1 poh nàng dong kờl càr Dăk Lăk tàm broă rơcang sơndră mờ kòp mờ sền gàr, sơm kòp cau kòp Covid-19 in. Jăt khà kờp bơh Sở Y tế càr Dăk Lăk, tus drim òr (27/10), càr do neh gŏ 3 rơbô 479 nă cau gơtìp mờ kòp Covid-19, tàm hơ̆ cau gam sơm kòp là 1 rơbô 436 nă.

Cau mblàng Ndong Brawl