VOV4.K’ho- Sơnơm vaccine rơcang sơndră kòp Covid-19 gam rê tus Việt Nam mờ khà uă ngan, mơya uă bơta. Bộ Y tế pal tam pà dipal ai tơl tiah in nàng gàr tŭ tơngai cit sơnơm vaccine mhar ngan rlau jơh dilah gơtùi, ngan là tàm ală càr tiah đah mat tơngai mut dà lơgar mờ tiah Tây Nguyên, là ală tiah gam geh broă gơlik geh bơh kòp bơtờp kal ke ngan. Do là dùl tàm ală broă tờm mờ Mpồl đơng lam dà lơgar rơcang sơndră kòp Covid-19 đơs nền tàm dơ̆ pơrjum geh lơh drim ngai 03/11 tàm Hìu lơh broă Chính phủ, cribơyai bè broă rơndap lơh bal sơndră geh cồng nha mờ kòp Covid-19.

Phó Thủ tướng ồng Vũ Đức Đam, Phó Kuang atbồ Mpồl đơng lam dà lơgar neh đơng lam dơ̆ pơrjum. Jat Phó Thủ tướng ồng Vũ Đức Đam đơs, broă rơndap lơh bal jơh ală bơta do mờ ală broă lơh pa geh lam lơh tàm tơngai tus tŭ khà cit sơnơm vaccine neh uă. Ai tàm tơngai tŭ do kung gam pal lam lơh ală broă lơh kơryan, đal git bă tiah, tam cah is ờ huan kràñ ir, ngac ngar mờ ờ hềt sang tĕ broă lơh ơm yah ngài mpồl bơtiàn jat Jơnau sồr sồ 16.

Cau mblàng K’Duẩn