VOV4.K’ho- “Cau tĕ khà là cau tàm tiah ndai tus, ơm tàm ù tiah wàng se kơryan kòp den geh đùh sră tĕ khà kuang bàng Quốc hội mờ kuang bàng Hội đồng Nhân dân kấp càr tàm tiah hơ̆”. Do là dùl tàm ală jơnau bơto pơlam pa bơh Cơldŭ lơh broă Mpồl duh broă tĕ khà dà lơgar dê tàm ngai 20/5, pơyua Ủy ban Tĕ khà tàm ală càr, ƀòn dờng gơwèt dà lơgar bè broă kờp sền, gĭt nền gơnoar đùh sră bơh cau tĕ khà gam lơh jăt broă ơm yah ngài rơcăng sơndră kòp Covid-19.

Broă gĭt nền gơnoar đùh sră bơh cau tĕ khà gam lơh jăt jơnau sồr ơm yah ngài tàm hìu sơnơm tàm ală anih ơm yah ngài tơrgùm bal geh lơh jăt jơnau sồr bơh Adat Tĕ khà kuang bàng Quốc hội mờ kuang bàng Hội đồng Nhân dân dê mờ ală jơnau bơto pơlam bơh Mpồl duh broă tĕ khà dà lơgar dê cih tàm sră nggal sồ 234 bơto pơlam broă lơh sră cih măt cau tĕ khà mờ gùng dà lơh jăt broă đùh sră gơwèt mờ ală cau gam ơm yah ngài tàm hìu sơnơm, rơcăng sơndră kòp Covid-19 mờ tàm ală tiah geh kòp bơtờp.

Gơwèt mờ cau tĕ khà gam lơh jăt jơnau sồr ơm yah ngài tàm tiah làng bol ơm kis lơh jăt jơnau sồr ơm yah ngài mpồl bơtiàn halà wàng se kơryan kòp jăt Kơrnoat sồr sồ 16 bơh Thủ tướng Chính phủ dê mờ ờ hềt geh măt tàm sră cih măt cau tĕ khà bơh tiah đùh sră tàm ù tiah hơ̆ dê den sồr mpồl tĕ khà sền wơl mờ lơh sră cih măt ală cau tĕ khà do mờ pơyoa tus Ủy ban Nhân dân kấp xã in nàng bơtơl tàm  sră cih măt cau tĕ khà tàm tiah đùh sră pa tiah geh ù tiah ơm yah ngài.

Cau mblàng Lơ Mu K’Yến