VOV4.K’ho- Mho ngai 15/10, ồng Nguyễn Phước Lộc- Phó Kuang atbồ Mpồl hòi jà làng bol dà lơgar neh geh dơ̆ lơh broă mờ càr Bạc Liêu bè broă lơh rcang sơndră kòp Covid-19. Jat jơnau yal, dơ̆ bơtờp kòp dơ̆ 4 tàm Bạc Liêu geh 823 nă cau bơtờp mờ virus Sars CoV-2, geh 5 nă cau gơtìp chơ̆t.

Ồng Nguyễn Phước Lộc- Phó Kuang atbồ mpồl hòi jà làng bol dà lơgar đơs tàm dơ̆ lơh broă

Tàm dơ̆ lơh broă, ồng Nguyễn Phước Lộc pà gĭt, Mpồl hòi jà làng bol dà lơgar neh tàm tơrbŏ bal hòi jà tă pơgồp dong kờl 4 rơbô ding mờ dong kờl ai mpồl lơh sơnơm Bạc Liêu in cĭt ai làng bol in tàm 2 ngai, tàm tơngai tus geh pơn jat tai lơh jat broă rơndap lơh dong Bạc Liêu gờñ glòm jơh vaccine gùt làng bol. Bơdìh hơ̆, Mpồl kung neh hòi jà dùl mpồl lơh sa kă bro tàm ƀòn dờng Hồ Chí Minh dong kờl Bạc Liêu in 3 rơbô 200 kơldung sơnơm sơm kòp ai cau F0 in tàm hìu mờ kờp jơh priă là 32 tơmàn đong, pà 100 nơm bình oxy khà 4 lĭt.

Cau mblàng K’Hạnh