VOV4.K’ho - Drim òr (24/08), Đại tướng Phan Văn Giang, Ủy viên Bộ Chính trị, Phó Bí thư Quân ủy Dà lơgar, Bộ trưởng Bộ Quốc phòng mờ Phó Thủ tướng ồng Lê Văn Thành neh tus còp, lam sồr mpồl y, bác sĩ, kuang bàng, cau ling tàm gơl sơnrờp tam dră mờ kòp tàm hìu sơnơm Quân y 175, ală anih gròi sền kòp tàm ƀòn dờng Hồ Chí Minh.

Đơs tàm dơ̆ lơh broă, Phó Thủ tướng ồng Lê Văn Thành pơn jờng mpồl ling đơs bal, cau lơh sơnơm ling klàng đơs is, tàm hơ̆ geh hìu sơnơm 175 neh lam lài tàm broă tus rơcang sơndră mờ kòp gơtờp; mờ sồr ală kuang bàng, cau ling lơh niam kơnòl sền gàr kơl jăp bơta lơngăp lơngai, ờ do ờ dă mờ gàr tơl phan sa, phan ngui làng bol tàm tiah gơtìp kòp in; tơmù ờ uă ngan broă di gơlan gơtờp kòp nàng geh sùm mpồl tus bal rơcang sơndră mờ kòp. Kung tàm drim òr (24/08), mpồl kuang bàng lơh broă neh tus còp, sền gròi mờ lam sồr kuang bàng, cau ling lơh kơnòl tàm anih gròi sền rơcang sơndră mờ kòp mờ ală anih lơh broă rài kis lơh sa mpồl bơtiàn jal mhar tàm quận Bình Tân, ƀòn dờng Hồ Chí Minh.

Cau mblàng Ndong Brawl