VOV4.K’ho- “Pơn jăt tai sơlơ lam lơh jăt geh cồng nha ală broă lơh rơcăng sơndră kòp Covid-19, bal mờ bơtàu tơnguh wơl mờ bơtàu tơnguh lơh sa- mpồl bơtiàn tàm ù tiah he dê; geh broă lơh niam rlau tai nàng gàr kơ̆ giă, kơ̆ kơl jăp drà kă bro mờ dong kờl tă bơsong kal ke ai lơh sa, kă bro bơh mpồl lơh sa kă bro mờ làng bol dê in...là ală broă tờm geh cau tĕ khà càr Dăk Lăk đơs tàm dơ̆ Pơrjum tìp măt cau tĕ khà tơnơ̆ dơ̆ pơrjum dơ̆ 2, Quốc hội khoă XV mờ Mpồl kuang bàng Quốc hội càr Dăk Lăk tàm ngai 18/11.

Tài bơta kòp Covid-19 gơbàn kal ke, Pơrjum tìp măt cau tĕ khà tàm càr Dăk Lăk bơyai lơh jăt broă lơh pờ tơlik tơn tàm internet bơh anih pờ tơlik tờm là tàm hìu duh broă Hội đồng Nhân dân càr tus ală tiah. Tàm pơrjum tìp măt, ală cau tĕ khà neh sền gròi mờ đơs uă tơngume gơrềng tus broă pơn jăt tai sơlơ lam lơh jăt geh cồng nha ală broă lơh rơcăng sơndră kòp Covid-19, bal mờ bơtàu tơnguh wơl mờ bơtàu tơnguh lơh sa- mpồl bơtiàn tàm càr; geh ală broă lơh niam rlau tai nàng gàr kơ̆ giă, kơ̆ kơl jăp drà kă bro mờ dong kờl tă bơsong kal ke ai lơh sa, kă bro bơh mpồl lơh sa kă bro mờ làng bol dê tềng đăp bơta gơrềng bơh kòp Covid-19 dê.

Cau mblàng Lơ Mu K’Yến