VOV4.K’ho- Ngai 07/10, tàm anih tàm tơrbŏ tiah tờm ƀòn dờng Dà Làc dê, Mpồl kuang bàng Quốc hội càr Lâm Đồng neh bơyai lơh tìp măt mờ cau tĕ khà gah ală anih lơh broă, mpồl lơh broă, mpồl gah đảng, gơnoar ătbồ, mặt trận dà lơgar Việt Nam càr mờ ală kơnhoàl Lạc Dương, Đơn Dương, Đức Trọng bơh broă lơh geh tìp măt tơn mờ tìp măt bơh tàm internet.

Ồng Trần Đình Văn- Phó Bí thư duh broă sùm Tỉnh ủy, Kuang ătbồ Mpồl kuang bàng Quốc hội càr Lâm Đồng neh iăt kơno jơnau đơs tă pơgồp bơh cau tĕ khà dê

Tàm dơ̆ tìp măt, ală kuang bàng Quốc hội neh yal mờ cau tĕ khà càr Lâm Đồng in bè ală tơngume kuơmàng bơh pơrjum dơ̆ 2, Quốc hội khoă XV dê kờp dŭ sơnđờm mŭt pơrjum bơh ngai 20 nhai 10 do tus ngai 13 nhai 11 tus; yal dùl êt broă lơh sa- mpồl bơtiàn bơh càr dê mờ bơh jơh gùt lơgar dê tàm 09 nhai bơh nam 2021 dê mờ broă rơndăp lơh tàm 3 nhai gam wơl bơh nam do dê. Bal mờ broă tơlik nùs nhơm pin dờn, sền gròi bơh Đảng, Dà lơgar, Chính phủ dê tàm broă dong kờl bơtàu tơnguh lơh sa- mpồl bơtiàn, rơcăng sơndră kòp Covid-19, cau tĕ khà càr Lâm Đồng đơs tus uă broă kờñ pal pơn jăt tai geh sền gròi bơsong mờ lơh niam wơl.

Hơ̆ là bè broă lơh ătbồ sền gàr brê gam ờ hềt lơh kràñ, drà blơi phan lơh geh bơh sươn sre gam ờ hềt niam, lơh sa sươn sre jăt gùng dà hữu cơ tơnguh uă priă jền gam ờ hềt uă, bơta càn priă bơdìh sa priă cồng uă ai càn priă sa priă cồng uă kung gam geh sơl tàm ală ƀòn lơgar, pơhìn bơtờp kòp Covid-19 tàm ală drà tờm mờ cau măy rơndeh pơndiang phan kă bro gùng jòng...

  Cau mblàng Lơ Mu K’Yến