VOV4.K’ho- Tềng đap bơta gơlik geh kal ke bơh dơ̆ bơtờp kòp Covid-19 tàm ƀòn dờng Hồ Chí Minh, Bộ Quốc phòng neh di tŭ ai mpồl ling, rơndeh rơndồ lơh ngan dong kờl ai broă lơh rcang sơndră kòp.

Tŭ do, jơh 9 càr tàm tiah Quân khu 7 ndrờm geh kòp, tàm hơ̆ kal ke ngan rlau jơh là tàm ƀòn dờng Hồ Chí Minh mờ gĭt nđờ rơbô nă cau kòp pah ngai, pơn jat hơ̆ là Bình Dương, Long An, Đồng Nai… Jat jơnau sồr bơh Bộ Quốc phòng, Cục Quân y mờ Quân khu 7 dê neh sơr băc mhar tam gơl gơnoar lơh broă bơh Hìu sơnơm ling klàng làng bol tiah đah mat tơngai lik dê gơ gơs là hìu sơnơm mìng sơm kòp Covid-19 ai ling klàng mờ làng bol tàm tiah ƀòn dờng Hồ Chí Minh in bal mờ 400 nơm jơnờng mờ lam lơh sir jơh hìu sơnơm ing sồ 5A. Jơh bal 2 hìu sơnơm do gam sơm kòp ai 581 nă cau kòp Covid-19 in, khà cau kòp do gam pơn jat tai gơguh jat bơta kòp tàm tiah do dê. Thiếu tướng, PGS.TS ồng Nguyễn Hồng Sơn, Kuang atbồ Hìu sơnơm 175 pà gĭt, hìu sơnơm gam geh jơnau dan tơnguh uă bơta pràn xét nghiệm sền gŏ cau kòp Covid-19 mờ geh sac rơ wah là dùl tiah cĭt sơnơm vaccine ai gùt làng bol in nàng kơryan kòp, tŭ do hìu sơnơm gam lơh ngan lam lơh broă do. Thiếu tướng, PGS.TS ồng Nguyễn Hồng Sơn đơs:

Uă cau bơtờp kòp pa do, Hìu sơnơm 175 sền gŏ rlau 120 nă cau bơtờp kòp ơm tàm mpồl bơtiàn tàm tŭ kham sac rơwah. Dùl nă ling geh griăt bơh Hìu sơnơm 175 dê neh bơtờp kòp neh lơh kơnòl broă tàm cơldŭ kham kòp tiah sơnrờp. Bol añ neh geh jơnau đơs, jơnau dan mờ Cục Quân y nàng gàr niam ngan rlau jơh tơl broă lơh sơm kòp mờ gàr niam ai broă lơh bơh Hìu sơnơm dê, ờ gơrềng tus bơta pràn rcang lài sơndră wơl bơh Hìu sơnơm dê. Hìu sơnơm kung neh dan ai gờñ măy xét nghiệm is mờ bơta pràn xét nghiệm 1 rơbô mẫu dùl ngai, nàng gàr niam jơnau sồr geh ngan bè tŭ do.

Ală y, bác sĩ Quân khu 7 lòt gùng dong kờl ƀòn dờng Hồ Chí Minh sơndră kòp

Pơgồp bơnah kơryan kòp, mpồl ling bơh mpồl ling klàng mờ Quân khu 7 dê neh ai tai rơndeh xét nghiêm cơ động mờ ală măy xét nghiệm uă. Quân khu 7 neh ai 55 tiah ai ơm yah ngài ai ală cau F1 in mờ rlau 12 rơbô 500 nơm jơnờng. Mơkung neh crơng gơs gơs 68 mpồl, mpồl lơh broă rcang sơndră kòp, crơng gơs ală mpồl chuyên khoa, 51 mpồl jòi gĭt tiah lòt rê, rlau 200 mpồl xét nghiệm mờ neh xét nghiệm ai rlau 37 rơbô 800 mẫu, cĭt rlau 10 rơbô 900 ding vaccine ai làng bol in pơgồp bơnah kơryan kòp tàm ƀòn dờng Hồ Chí Minh. Bal mờ Hìu sơnơm ling klàng làng bol tiah đah mat tơngai lik mờ Hìu sơnơm ing sồ 5A mìng sơm kòp cau kòp Covid-19 tàm ƀòn dờng Hồ Chí Minh mờ ală càr rềp bal in, Quân khu 7 gam pơn jat tai lam lơh hìu sơnơm ing sồ 5B jat jơnau sồr bơh Bộ Quốc phòng dê nàng di pal mờ bơta kòp kal ke tàm ù tiah do dê. Thiếu tướng Võ Văn Tri, Phó Tư lệnh Quân khu 7 pà gĭt:

Bol añ rcang lài lam lơh hìu sơnơm ing sồ 5B, ală broă lơh rcang lài bol añ neh rcang sir jơh. Tŭ geh kơrnoat lam lơh hìu sơnơm ing sồ 5B mờ geh kơrnoat lam lơh bơh ală mpồl lơh broă, mpồl rơndap broă lơh, gơwèt mờ Quân đoàn 4 mờ Binh đoàn 16 den bol añ geh tàm tơngai lơyah ngan pơgap 5 jiơ đồng hồ, bol añ geh crơng gơs tơn hìu sơnơm ing sồ 5B, mờ tàm pơgap 24 jiơ mờ tàm 24 jiơ hơ̆ bol añ gơtùi rcang mut lơh broă tơn. Hìu sơnơm do kờp jơh cau lơh broă geh 150 nă cau, bơh ală hìu sơnơm bơh quân khu mờ bơh Quân đoàn 4 bal mờ Binh đoàn 16 dê atbồ.

Ling klàng kung neh sồr ală mpồl ling lơh broă ờs mờng tus bal pơgồp bal dờp, tam pà bal 4 rơbô 511 nă Kuang bàng, cau lơh sơnơm ai tai bơta dong kờl ai ală tiah tàm ù tiah Quân khu 7 in. Tàm hơ̆, mìng is ai tai ƀòn dờng Hồ Chí Minh in là 4 rơbô 025 nă Kuang bàng, cau lơh sơnơm rcang sơndră kòp. Thượng tướng Vũ Hải Sản, Thứ trưởng Bộ Quốc phòng pà gĭt, bơta kòp gam kal ke tàm ƀòn dờng Hồ Chí Minh, Bộ Quốc phòng neh ai mpồl ling, rơndeh rơn dồ măy mok tàm ală quân khu mờ ală mpồl lơh broă gùt mpồl ling dê lòt tàm ù tiah Quân khu 7, tơrgùm mpồl cau lơh broă rcang sơndră kòp mờ rcang  sơndră lài, sền gĭt do là kơnòl broă kuơ màng bè mut tàm dơ̆ tam lơh jal mhar bal mờ bơta lòng sền gàr bơta lơngap lơngai ờ geh bơh lài:

Mìng is Ling klàng ai tai Quân khu 7 in, mpồl ling lơh kloh khuẩn rlau 20 nơm rơndeh. Bộ Quốc phòng jàu kơnòl broă geh bal mờ Quân đoàn 4, mpồl ling hoá học mờ Quân khu 7 tài làng bol lơh broă jơh ngai mờ mang jat jơnau sồr bơh tiah do dê mờ geh  bal jơh ƀòn dờng Hồ Chí Minh, Đồng Nai, Bình Dương mờ ală càr. Mìng is ling klàng lơh sơnơm neh ai Quân khu 7 in là 270 nă mờ ală phan bơna kỹ thuật dong ai Quân khu 7 mờ ngan là ƀòn dờng Hồ Chí Minh in

Ờ mìng dong kờl ƀòn dờng Hồ Chí Minh mờ ală càr geh kòp rềp bal in mờ mpồl lơh broă lam lài sơndră kòp, mpồl ling klàng gam lơh ngan dong kờl broă tàm ală tiah, dong làng bol tàm tiah ai ơm yah ngài tơrmù ƀà bơta kal ke. Ală ngai pa do, ală mpồl ling mờ mpồl ling klàng dê neh dong kờl làng bol ƀòn dờng Hồ Chí Minh in rlau 70 tấn biăp, bùm, plai đo, rlau 41 rơbô nai tap, 50 tấn phe, gĭt nđờ rơbô thung ƀung mi mờ uă phan kờñ ngui sa kuơ màng ndai tai. Bơh ală broă lơh “rề ơnàng uă bơta kờñ gơboh”, “hìu ram mhŭ ling klàng làng bol”, “Siêu thị sàng kloh”, “phe 0 đong”, “anih ràng tăc phan 0 đong”... ală phan bơna bơh mpàng tê cau ling dê neh tus mờ làng bol, lơh ram mhŭ nùs nhơm làng bol tàm tiah wàng se kơryan kòp, pơgồp bơnah sơm bat tê bal sơr lèt gan bơta kal ke, lơh ngan jơh nùs kơryan kòp.

Jat VOV1- Cau mblàng K’Hạnh