VOV4.K’ho – Tềng đap ală broă gơlik geh kal ke bơh kòp Covid-19 dê tŭ lơgar rềp bal là Campuchia gam geh khà cau bơtờp kòp Covid-19 gơguh uă, càr Mondulkiri, tiah rềp nhàr mờ 2 kơnhoàl Ea Súp mờ Buôn Đôn bơh càr Dak Lak dê kung neh geh cau bơtờp kòp Covid-19. Mờ nùs nhơm ờ lời kòp bơtờp gan tiah nhàr dà lơgar, ală pôs ling sền gàr tiah nhàr dà lơgar tàm càr Dak Lak neh gàr sùm 100% ală anih sền gròi mờ khà ling lơh kơnòl lòt sền, sền gròi tàm tiah nhàr dà lơgar. Mờ kung sơlơ tơnguh mpồl ling, phan bơna, rơndeh rơndồ tàm ală tiah kuơmàng, kal ke, di tŭ git gŏ, kơryan kràñ cê broă dô gan tiah nhàr dà lơgar tìs mờ adat boh lam.

Là cau tus bal tơn tàm broă lơh jòi mờ kơryan di tŭ 12 nă cau dô gan tiah nhàr dà lơgar tìs mờ adat boh lam bơh Campuchia gan gùng nhàr dà lơgar gơ wèt kơnhoàl Ea Súp tàm mang ngai 25/4 pa do, Trung úy Cao Tiến Dũng, gam lơh kơnòl broă tàm anih sền gròi rơcang sơndră kòp Covid-19 bơh pôs ling sền gàr tiah nhàr dà lơgar Ia Rvê dê yal: “Bơh ơm mơt mờ kơryan, git gŏ ală tềl lời wơl den he lòt jat ală tềl lời wơl mờ git gŏ ală cau mut tàm lơgar den yal, pơgồp bal mờ ală mpồl lơh broă tàm xã nàng kơryan mờ lam lơh broă tam cah is tơrgùm bal di tŭ. Dilah tiah nhàr dà lơgar ờ geh sền gròi kơ̆ den cau mut tàm lơgar he lơh gơ rềng kơn jơ̆ kơn jut ngan den tàng bol hi pal tơnguh nùs nhơm rơcang ngac, tơnguh kơnòl broă rlau tai, rơcang sơndră kòp bè sơndră mờ bol sò tơm”.

Cau ling sền gàr tiah nhàr dà lơgar ơm gak tàm anih sền gròi rơcang sơndră kòp Covid-19 mpồng nhàr lơgar Dak Ruê

Jat Đại úy Hoàng Văn Tuân, Phó Kuang atbồ Pôs ling sền gàr tiah nhàr dà lơgar Ia Rvê yal, bơh ngai 25/4 tus tŭ do, tàm ală gơl gùng nhàr dà lơgar bơh kơnhoàl Ea Súp dê, mpồl ling sền gàr tiah nhàr dà lơgar neh pơgồp bal mờ ală mpồl lơh broă geh gơnoar di tŭ git gŏ mờ kơryan 3 broă dô gan tiah nhàr dà lơgar bal mờ 17 nă cau dô gan tiah nhàr dà lơgar tìs mờ adat boh lam. Đal git tŭ tơngai tus, bơta do gam pơn jat tai gơlik geh, den tàng mpồl ling neh pơn jờng oh mi sơrlèt gan ală kal ke, kòl yan bè trồ tiah, ù tiah nàng lơh niam kơnòl broă he dê mờ nùs nhơm lơh ngan gàr ờdo ờdă, kơ̆ kơljap mờ ring lơngai tàm tiah nhàr dà lơgar: “Mpồl lơh broă bơh pôs ling dê ờ huan uă, mờ ală cau dô gan tiah nhàr dà lơgar sùm mut tàm tŭ jơ lơh broă tàm ngai, bal mờ hơ̆ bơta trồ tiah, ù tiah lơh broă den gam tàm kàl prang duh, ù tiah ring, ro kơnrrañ, làng bol sơ mờm bơta hơ̆ nàng mut, ờ mut tàm ală gơl gùng mùl màl mờ rah rài tàm tiah nhàr dà lơgar. Tềng đap ală kal ke hơ̆, mpồl đơng lam pôs ling neh tam pà kơnòl broă ngan ngồn, ơm gak tàm tiah nhàr dà lơgar mờ tàm pơ dờn gơp ơm gak, tam pà gơs tơl mpồl lơh broă nàng tàm pơ dờn gơp lam lơh kơnòl broă tàm tiah nhàr dà lơgar nàng kơñ sền gròi dùl bă niam ngan rlau jơh”.

Ai tàm anih sền gròi rơcang sơndră kòp Covid-19 bơh Pôs ling sền gàr tiah nhàr dà lơgar Dak Ruê dê, broă lơh lòt sền, sền gròi kung geh pôs ling tơrgùm lam lơh dùl bă uă ngan rlau jơh, Trung tá Phùng Văn Bình, Kuang bàng lơh sơnơm ling klàng pôs ling sền gàr tiah nhàr dà lơgar Dak Ruê pà git: “Oh mi tàm do lòt sền gròi tiah nhàr dà lơgar, rơcang sơndră kòp bơtờp. Dilah geh cau dô gan tiah nhàr dà lơgar den oh mi ơm mơt, sền gròi jun rê hờ anih tam cah is bơh pôs ling dê. Oh mi sền gròi tàm do mờ oh mi tàm pôs ling mờ nùs nhơm rơcang sơndră kòp jơnhua ngan rlau jơh, ờ lời kòp mut tàm tiah nhàr dà lơgar”. 

Thượng tá Nguyễn Minh Tuyên, Phó Kuang atồ Gah đơng lam mpồl ling sền gàr tiah nhàr dà lơgar càr Dak Lak pà git, tàm jơh gùt tiah nhàr dà lơgar jòng rlau 73 kơi sồ rềp mờ càr Mondulkiri, lơgar Campuchia, ală pôs ling sền gàr tiah nhàr dà lơgar neh sơlơ tơnguh broă lơh lòt sền, sền gròi, lơh ngan kơryan kràñ cê broă mut tàm lơgar he tìs mờ adat boh lam. Bal mờ hơ̆, ală pôs ling pơnjat tai pơgồp kràñ cê mờ kấp ủy, gơnoar atbồ kấp hơđơm, kuơmàng là tàm 4 xã tiah nhàr dà lơgar gơ wèt ală kơnhoàl Ea Súp mờ Buôn Đôn, tơnguh broă lơh mblàng yal, tơnguh jơnau git wă, bơta chài, broă lơh ai làng bol in tàm broă rơcang sơndră kòp Covid-19: “Mpồl ling neh lam lơh gàr sùm 6 anih sền gròi dùl bă tiah, 18 mpồl lòt sền gròi làm bă tiah, sơlơ rơcang phan bơna, pơn jờng kuang bàng, cau ling lòt sền gròi ngai mang nàng gàr tiah nhàr dà lơgar kơ̆ kơljap mờ nùs nhơm lơh ngan ờ lời khat dùl nă cau lơi dô gan tiah nhàr bơh lơgar Campuchia mut tàm lơgar he mờ ờ gơtìp sền gròi”.

Sơrlèt gan kal ke, bòl glar tàm tiah nhàr dà lơgar, tơl nă kuang bàng, cau ling sền gàr tiah nhàr dà lơgar càr Dak Lak ndrờm git wă, lơh ngan ờ lời kòp Covid-19 mut tàm ù tiah càr dê.

Cau mblàng K’Duẩn