VOV4.K’ho- Tềng đap bơta gơlik geh ờ gơtùi gĭt lài bơh kòp Covid-19 dê, mpồl ling sền gàr tiah nhàr lơgar càr Kon Tum pa geh ai tai mpồl ling nàng kơryan ală cau dô gan tiah nhàr lơgar tìs mờ kơrnoat boh lam tàm 2 gơl gùng tiah nhàr lơgar rềp nhàr bal mờ lơgar Lào mờ Campuchia. Jat hơ̆ geh 8 Pôs đồng ling sền gàr tiah nhàr lơgar càr Kon Tum geh ai tai mờr 100 nă sỹ quan, ling geh griăt lơh broă ờs mờng gơwèt Gah đơng lam ling klàng càr dê.

Mpồl ling sền gàr tiah nhàr lơgar mblàng yal broă rcang sơndră kòp Covid-19 ai năc lòt nhơl in tàm tiah jrong tiah nhàr lơgar Việt Nam- Lào- campuchia

Tơnơ̆ tŭ geh dờp mpồl ling geh ai tai, Gah đơng lam Mpồl ling sền gàr tiah nhàr lơgar càr Kon Tum neh bơyai lơh pơlam tàp bè bơta gơlik geh tàm tiah nhàr lơgar, bơta kòp Covid-19 tàm lơgar Lào mờ Campuchia, mơkung lơh nền loh gơnoar broă, kơnòl broă bơh Kuang bàng, cau ling Gah đơng lam ling klàng càr dê tàm tơngai ai tai mpồl ling ai 8 Pôs đồng ling sền gàr tiah nhàr in. Mpồl ling sền gàr tiah nhàr lơgar càr Kon Tum pà gĭt, Kuang bàng, cau ling tàm gơl gùng tiah nhàr lơgar jòng rlau 292 kơi sồ rềp mờ lơgar Lào mờ Campuchia kung sùm geh bơta sền gròi, pơn dờm pơn diang jơh bal bè nùs nhơm mờ phan bơna tàm tŭ lơh jat kơnòl broă dơ̆ lĕ bal, hơ̆ là sền gàr tiah nhàr lơgar mờ rcang sơndră kòp Covid-19.

Cau mblàng K’ Hạnh