VOV4.K’ho- Lơh jăt jơnau sồr bơh Chính phủ dê mờ Bộ Quốc phòng dê, broă lơh rơcăng sơndră kòp Covid-19 tàm gơl gùng tiah nhàr lơgar tàm càr Kon Tum gam pơn jăt tai geh mpồl ling sền gàr tiah nhàr lơgar sơlơ tơnguh tai bal mờ uă broă lơh nàng kờñ kơryan kòp lơh bơtờp tàm ù tiah càr dê.

 Tiah mpồng nhàr lơgar dunia Bờ Y, gơwèt xã Pờ Y, kơnhoàl Ngọc Hồi, càr Kon Tum geh rlau 20 kơi sồ gùng nhàr lơgar rềp nhàr bal mờ lơgar gơ̆p bơyô Lào bal mờ Campuchia sùm geh lài bơta pơhìn làng bol bơh đah ne tiah nhàr lơgar mŭt tàm do tìs mờ kơrnoat boh lam. Tềng đăp bơta do, Pôs đồng ling sền gàr tiah nhàr lơgar mpồng nhàr lơgar dunia Bờ Y neh crơng gơs 6 mpồl, anih gròi sền kòp Covid-19 dùl anih mờ ntrờn làm bă tiah. Tàm ală anih do bal mờ 45 nă kuang bàng, cau ling sền gàr tiah nhàr lơgar gam geh mpồl ling klàng làng bol griăp ƀòn bơh xã dê lơh sùm broă drơng găk, lòt sền jăt gơl gùng tiah nhàr lơgar jơh bal ngai kung bè mang. Ồng Đoàn Xuân Trường Thiếu tá, Phó Kuang ătbồ Mpồl hòi jà làng bol, Pôs đồng ling sền gàr tiah nhàr lơgar mpồng nhàr lơgar dunia Bờ Y pà gĭt, tơl nă kuang bàng, cau ling tus bal tàm ală anih, tiah gròi sền ndrờm lơh ngan sơrlèt gan kal ke nàng lơh sir niam kơnòl broă geh jàu. Ồng Đoàn Xuân Trường Thiếu tá, Phó Kuang ătbồ Mpồl hòi jà làng bol, Pôs đồng ling sền gàr tiah nhàr lơgar mpồng nhàr lơgar dunia Bờ Y, yal: Bol añ ngai mang lơh broă sùm tàm mpồl, anih mờ lòt sền gròi sền ờ lời rlau gơmŭt mờ ătbồ kràñ ờ lời kòp lơh bơtờp. Bulah oh mi tàm anih tàm mpồl gròi sền kòp kung là kal ke ngan, bè bơta phan bơna siơ̆u siar ngan. Hơ̆ sồng broă lòt rê kal ke tai mơya oh mi sơrlèt gan kal ke nàng lơh sir niam kơnòl broă geh jàu.

Kuang bàng, cau ling sền gàr tiah nhàr lơgar mpồng nhàr lơgar dunia Bờ Y lòt sền gròi sền rơcăng sơndră kòp Covid-19 tàm gơl gùng tiah nhàr lơgar

 Bal mờ sơlơ ătbồ, kơryan broă làng bol bơh tiah đah ne tiah nhàr lơgar mŭt tàm tiah do tìs mờ kơrnoat boh lam, Pôs đồng ling sền gàr tiah nhàr lơgar mpồng nhàr lơgar dunia Bờ Y kung lơh pràn sơl broă lơh mblàng yal, rơcăng sơndră kòp Covid-19 ai năc lòt nhơl mờ làng bol geh mìr sre lơh sa rềp tàm tiah nhàr lơgar in. Kuang bàng, cau ling bơh Pôs đồng ling sền gàr tiah nhàr lơgar dê lòt tus tàm tơl hìu làng bol dê bơto pơlam làng bol in pơn chèu glòm muh măt tŭ lòt mbrê mờ lơh jăt ală jơnau pal jăt rơcăng sơndră kòp; ờ gŏ lòt rê gan tiah nhàr lơgar lòt mbrê tìs mờ kơrnoat boh lam...Cồng nha lồi dŭt pà gŏ, bal mờ tơnguh uă geh bơta gĭt wă bè bơta sơbơng roh bơh kòp Covid-19 dê, tơl nă làng bol ơm kis tàm ù tiah nhàr lơgar gam là cau dong kờl bơh mpồl ling sền gàr tiah nhàr lơgar in tàm broă lơh rơcăng sơndră kòp mờ sền gàr lơngăp lơngai tiah nhàr lơgar. Mò Nang Cứu, ơm tàm ƀòn Iệc, xã Pờ Y geh mìr lơh sa rềp tiah nhàr lơgar rềp nhàr bal mờ lơgar gơ̆p bơyô Lào, pà gĭt: Tŭ lơh mìr tàm do den làng bol sùm geh kuang bàng ling sền gàr tiah nhàr lơgar mblàng yal. Làng bol ƀòn lơgar mờ he tìp cau muh măt krơi den là yal tơn mờ ală cau ling sền gàr tiah nhàr lơgar in gĭt.

Ồng Đặng Nguyên Hương là Trung tá, Bí thư Đảng ủy, Chính trị viên Pôs đồng ling sền gàr tiah nhàr lơgar mpồng nhàr lơgar dunia Bờ Y pà gĭt, kuang bàng, cau ling bơh Pôs đồng ling dê jơh nùs lơh ngan ờ lời gơtìp rơmơ̆p ndơl, gơtìp nisơna tềng đăp bơta gơbàn bơh kòp Covid-19 dê. Ồng Đặng Nguyên Hương, yal: Tềng đăp bơta gơbàn kal ke ngan bơh kòp Covid-19 dê tàm lơgar Campuchia bal mờ lơgar Lào den bol añ neh lam lơh ală broă lơh sền gàr tiah nhàr lơgar nàng kờñ gĭt ală bơta gơbàn bơh kòp Covid-19 dê tàm tiah đah ne nhàr lơgar nàng bơyai lơh mblàng yal ai làng bol mờ kuang bàng, cau ling tàm pôs đồng in gĭt nền bơta gơbàn bè kòp Covid-19 dê. Jơh nùs lơh ngan ờ lời kòp bơtờp bơh tiah nhàr lơgar lơh bơtờp tàm càr mờ tàm dơlam pôs đồng ling.

Mblàng yal rơcăng sơndră kòp Covid-19 ai làng bol in tàm tiah nhàr lơgar bơh Pôs đồng ling sền gàr tiah nhàr lơgar mpồng nhàr lơgar dunia Bờ Y dê ătbồ

Tềng đăp bơta gơbàn kal ke bơh kòp Covid-19 dê, geh gơl gùng tiah nhàr lơgar jòng rlau 292 kơi sồ rềp nhàr bal mờ lơgar Lào bal mờ Campuchia, mpồl ling sền gàr tiah nhàr lơgar càr Kon Tum tŭ do gam ai lơh broă sùm 66 anih kơryan, mpồl gròi sền bal mờ rlau 400 nă kuang bàng, cau ling jăt gơl gùng tiah nhàr lơgar nàng lơh jăt kơnòl broă dơ̆ lĕ bal hơ̆ là sền gàr tiah nhàr lơgar Dà lơgar dê mơkung rơcăng sơndră kòp Covid-19 lơh geh cồng nha sơl.    

                                    Cau cih Khoa Điềm- Cau mblàng Lơ Mu K’Yến