VOV4.K’ho - Kòp Covid-19 neh lơh gơrềng ờ niam uă ngan tus mờ broă lơh sa bơh ală mpồl lơh sa kă bro đơs bal mờ mpồl lơh sa kă bro tàm càr Dăk Lăk đơs is. Tàm kal ke, uă mpồl lơh sa kă bro tàm gah lơh sa, lơh kơphe tàm càr Dăk Lăk neh tơnguh sùm broă tam gơl pa, bơceh lơh nàng gơdờp mờ bơta bè ờs pa.

Là mpồl lơh sa kă bro mìng lơh kơphe gar coh, bŏ, kơphe klài phin mờ klài mờ măi... ồng Nguyễn Đình Viên, Kuang atbồ Công ty TNHH PM Coffee Dăk Lăk pà git: Bŭ lah kòp Covid-19 gam lơh drà kă bro kơphe gơmù, mơya mpồl lơh sa kă bro do kung gam bơcri priă tai nàng blơi phan lơh broă, công nghệ, pơn jăt tai lơh geh uă bơta phan, chồl pràn broă tam gơl sồ nàng ai phan tăc tàm drà kă bro điện tử.

Công ty TNHH PM Coffee Dăk Lăk bơcri tai priă blơi phan nàng brồ guh lơh sa tơnơ̆ mờ tơngai gơrềng bơh kòp Covid-19

Kờp dŭ kòp gơtờp geh kơrian tàm tơngai tus, drà kă bro geh gờñ brồ guh bơta pràn blơi, den tàng công ty neh tơnguh khà lơh nàng dờp bồ bơta pràn blơi di satềp mờr tus. “Kòp Covid-19 kung gơtìp uă kal ke, ală mpồl lơh broă pơn diang ơm ờ lơh broă, ờ pơn diang geh phan kă bro den bol añ at tê mờ dơ̆ bơto pơlam, sền gàr cau blơi, tơnguh bơtàu khà măt kă bro. Ndrờm bal mờ hơ̆ den tơnguh broă bơ̆t bơtàu bơta niam, lơh gơs broă ai tơlik ală phan pa tàm drà kă bro bè phan: kơphe klài, kơphe bơkah, kơphe bơta niam chài Tây Nguyên”.

Ồng Lê Văn Vương, kuang atbồ Công ty TNHH Lơh mờ kă bro Vương Thành Công, ƀòn dờng Buôn Ma Thuột pà git, bŭ lah gơtìp mờ uă kal ke, mơya công ty kung gam ờ ngòt bè bơta pràn tơnguh bơtàu. Den tàng, tàm tơngai ơm ing tăc phan tơn nàng di pal mờ broă kờñ rơcang sơndră mờ kòp gơtờp, công ty neh tơnguh broă yal khà măt kă bro, jòi drà kă bro bơh tàm internet mờ neh brồ guh di pơgăp bơh 50 tus 60% pơn drờm mờ lài. Ồng Lê Văn Vương đơs: “Tàm tŭ kòp gơtờp gơtìp kal ke den công ty Vương Thành Công neh lơh ngan ai jơh bơta ngăc ngar, bơta pràn, broă lơh mờng chài nàng ai geh bơnàng jă di lah kòp gơtờp neh jơh den bol añ geh ală bơta pràn, ală broă lơh kơl jăp nàng bol añ lơh broă pràn kơl dang rơlao. Dơ̆ bàr, bol añ tus bal yal uă tàm drà kă bro điện tử, kung bè yal tàm online ală bơta phan, kơl dung phan pa nàng tơnguh tai broă kờñ blơi bơh cau ngui sa dê”.

              Công ty TNHH Lơh mờ kă bro Vương Thành Công yal phan geh lơh pa tus mờ cau ngui sa

Jăt Sở Công thương càr Dăk Lăk yal, tơnơ̆ mờ tơngai ngui broă tam cah ngài mpồl bơtiàn nàng lơh jăt ală broă rơcang sơndră mờ kòp gơtờp, tus tŭ do ală mpồl lơh sa kă bro bơh càr neh rơhời brồ guh lơh broă. Uă mpồl lơh sa kă bro đơs là, tơnơ̆ mờ dùl tơngai jŏ gơtìp aniai tài bơh kòp Covid-19 den bơta pràn blơi tàm drà kă bro gam tơngŏ gơguh wơl. Den tàng, ală mpồl lơh sa kă bro gam tơnguh pràn ai rơndăp broă lơh sa kă bro, dờp bồ lài bơta pràn blơi geh kơ̆p kờñ geh gơguh pràn tàm ală nhai lồi nam.

Jăt ồng Phạm Minh Tấn, Phó Bí thư Thường trực Tỉnh ủy Dăk Lăk đơs: Kòp Covid-19 gơtìp neh lơh gơrềng ờ niam uă ngan tus mờ broă lơh bơh mpồl lơh sa kă bro kung bè rài kis làng bol. Mơya, mờ broă lơh ngan bơh gùt Đảng, gùt làng bol, tus tŭ do bơta kòp tàm càr neh, gam geh gròi sền mờ kơrian. Ală jơnau kờñ bè broă lơh sa mpồl bơtiàn tus tŭ do gam gơguh pơn drờm mờ tŭ do nam lài. Gơguh lơh sa bơh càr geh di pơgăp 5,3%, Tă tàm kes priă dà lơgar tàm càr kờp dŭ geh rơlao 5 rơbô 500 tơmàn đong, gơguh 3% pơn drờm mờ tŭ do nam lài. Nàng lơh geh cồng nha ală kơnòl nam 2021, ală nhai lồi nam, ală cấp ủy, gơnoar atbbồ, mpồl lơh broă; ală anih lơh broă, mpồl lơh broă, ală kơnhoàl, thị xã, ƀòn dờng tàm càr gam pơn jăt tai lơh jăt bơta mùl màl, jơnau geh ai bơh ală gùng dà broă lơh, bơyai lơh ndrờm bal, lơh geh cồng nha mờ lơh ngan uă, pơgồp bal tàm broă rơcang sơndră mờ kòp bal mờ broă tơnguh bơtàu broă lơh sa mpồl bơtiàn. Ồng Phạm Minh Tấn, Phó Bí thư Thường trực Tỉnh ủy Dăk Lăk đơs tờm: “Kòp Covid-19 lơh gơrềng mờr 2 nam do, neh lơh aniai uă ngan tus mờ broă tơnguh bơtàu broă lơh sa mpồl bơtiàn, mơya kung neh lơh jăt di mờ broă đơng lam bơh Dà lơgar, bơh Chính phủ dê là lơh jăt jơnau kờñ “dơ̆ lĕ” bal, là tơrgùm tơnguh bơtàu broă lơh sa mpồl bơtiàn mờ gàr niam broă rơcang sơndră mờ kòp Covid-19 mờ ală broă lơh sa kă bro ndai.. Bañ ờ sền gròi, bañ sền ờ sơ̆p, bañ ờ rơcang ngăc nàng lơh bè lơi ai geh tơl bơta niam ngan nàng he tơrgùm ală bơta pràn ring niam chính trị, tơnguh bơtàu broă lơh sa mpồl bơtiàn, gàr niam bơta lơngăp lơngai dà lơgar, bơ̆t bơtàu mpồl lơh broă chính trị tàm gùt càr”.

Ală broă lơh ngan bơh mpồl bơtiàn mpồl lơh sa kă bro tàm càr Dăk Lăk (tàm hơ̆ geh ală mpồl lơh sa kă bro lơh sa, kă bro kơphe) rơcang “gơdờp ờ do ờ dă, ndrờm bal” geh pơgồp bal niam tàm broă tơnguh bơtàu lơh sa mpồl bơtiàn tàm càr dê nam 2021. Bơh tŭ hơ̆ dùl dơ̆ tai ai tơngŏ bơngă lơh tờm bơh gah lơh kơphe dê gơwèt mờ càr Dăk Lăk đơs is mờ lơgar Việt Nam đơs bal.

Cau cih Hương Lý- Cau mblàng Ndong Brawl