VOV4.K’ho-Tơnơ\ tu\ ală rơndăp broă lơh tam gơl brê nàng tam kau su tàm Gia Lai ờ geh cồng nha, Chính phủ neh dùl nùs bal lời ai ală mpồl lơh sa kă bro in tam gơl ù rơndăp broă lơh nàng lơh wơl ală jơnau kờ` lơh broă sa sươn sre- brê bơnơm ndai bơdìh mờ kau su.

Bơta do geh pơn jat bal là mpồl lơh sa kă bro pal tam brê ala halà tong priă tam brê ala. Broă lơh do geh sền là nàng dong tă bơsong kal ke ai mpồl lơh sa kă bro in mơkung geh tam brê sơl. Mơya, broă tam brê ala tàm ală rơndăp broă lơh do bơh Gia Lai dê là kal ke ngan, tài bơh uă ngan mpồl lơh sa kă bro jòi tơl ală bơta ơm ing ờ lơh kơnòl broă bơh he dê.

Tơnơ\ tu\ dờp geh broă lơh bơh Chính phủ dê, Công ty lơh sa kă bro phan kă bro mờ lơgar ndai Quang Đức đơs lơyah là công ty Quang Đức neh jun sră yal gùng da broă lơh dan tam gơl 2.100 lồ kau su ờ geh cồng nha nàng ai ù tam tàu mờ bùm blàng.

Rơndăp broă lơh tam gơl brê ờ gam chi che tam kau su ờ huan geh cồng nha tàm xã Ia Blứ, kơnhoàl Chư Pưh, càr Gia Lai

Ồng Nguyễn Văn Toàn, Kuang atbồ Phòng atbồ sản xuất vật tư công ty do dê đơs là, do là 2 tờm chi tam lơyah ngai, dong mpồl lơh sa kă bro ai wơl priă bơcri mhar, priă tă bơcri ờ uă. Bơta do ndrờm bal mờ jơnau là công ty Quang Đức geh pal tam brê ala hala tơm priă, ndrờm mờ pơgăp 140 tơmàn.

Do là priă dờng, mờ gơlơh bè hoàc hươr ngan dilah jat tàm cồng nha lơh geh bơh tàu mờ bùm blàng tu\ do dê. Nàng công ty Quang Đức tam gơl gơtùi, jat ồng Toàn, công ty geh jòi tơl ală bơta ơm ing ờ gi\t tus tơngai lơi broă tam brê halà tơm priă tam brê ala.

Mpồl lơh sa kă bro geh tam gơl tam tàu mờ bùm blàng. Tài bơh mpồl lơh sa kă bro kal ke den tàng neh geh sră là dan tơn jo\ tơngai tơm priă tam brê. He jat tàm jơnau dan ai tơn jo\ tơngai lơm, mờ he ờ go\ dan là tơn jo\ tơngai tus nđờ ờ. Broă ù brê ờ gam uă tai, ù lơh broă sa rề ơnàng là broă bơh sở, bơh càr dê, bol a` mìng sền gròi tus broă bol a` dê gời.

Bơh nam 2008- 2011, UBND càr Gia Lai neh jàu rlau 32 rbô lồ brê ờ gam chi che ai 16 mpồl lơh sa kă bro tàm do in lơh 44 rơndăp broă lơh tam gơl tam kau su. Tơnơ\ mờ tu\ gơmu\t jrô, ală mpồl lơh sa kă bro jơh nùs ngan dan geh tam gơl rlau 12 rbô lồ tàm khà rlau 25 rbô lồ kau su ờ huan geh cồng nha nàng ai ù tam tờm chi tam ndai.

Dùl rơndăp broă lơh kau su ờ huan geh cồng nha gam dan tam gơl tàm kơnhoàl Chư Prông

Bơdìh mờ bă ù geh kau su, bă ù dan tam gơl là mờr jơ\t rbô lồ brê neh gơtìp koh jơh, kung gam lời sơrbì gời tus jơ\t nam do. Mơya, uă ngan mpồl lơh sa kă bro ndrờm ờ go\ kơlôi tus broă tam wơl brê. Ờ bài, pleh, halà jòi tơl broă nàng pleh ờ lơh broă tam brê ala, là ală bơta lơi mờ ală mpồl lơh sa kă bro neh lơh tàm uă nam do mờ gam pơn jat tai lơh nàng pleh mờ jơnau sồr bơh chính phủ dê nàng kờ` tam wơl brê.

Ồng Trương Phước Anh, Kuang atbồ Sở Nông nghiệp mờ Phát triển Nông thôn càr Gia Lai pà gi\t.

Tơnơ\ tu\ UBND càr yal, ală mpồl lơh sa kă bro neh lơh rơndăp broă lơh tam gơl. Tàm tơngai do, bol a` tơrgùm kờp geh 7 mpồl lơh sa kă bro: Hoàng Anh Gia Lai, Quang Đức mờ ală công ty ling klàng dê. Mơya mìng geh Hoàng Anh Gia Lai là đơs tus broă tam brê. Ală mpồl lơh sa kă bro ndai ờ go\ đơs tus broă tam brê.

Nàng tàm pìt geh ală rơndăp broă lơh tam gơl brê tus tam kau su, ală mpồl lơh sa kă bro ndrờm hơ ai broă lơh ai làng bol tàm tiah do in, bơ\t bơtàu phan bơna. Mơya, mờ priă jền bơcri ờ uă, mpồl lơh sa kă bro ờ gơtùi lơh jat jơnau hơ pơrgon bơh he dê. Uă mpồl lơh sa kă bro kung gam kơn jơ\ kơn ju\t ngan ờ bài kờ` tơm càr in mờr 10 tơmàn priă tăc dơm chi.

250 lồ ù brê gơ wèt rơndăp broă lơh kau su gơ wèt Tập đoàn Hoàng Anh Gia Lai gơtìp tam gơl gơlik gơs wơl là sươn chi sa plai 

Bơh bơta geh ngan uă bơta ờ suk tu\ tam gơl brê nàng ai ù tam kau su, ồng Huỳnh Thành, lài do là Phó Kuang atbồ Mpồl kuang bàng Quốc hội càr Gia Lai đơs là, pal kơrhia ngan tàm broă ai mpồl lơh sa kă bro in tam gơl rơndăp broă lơh dùl dơ\ tai. Nàng tơrmù bơta lơh tìs, lài ngan mìng ai mpồl lơh sa kă bro in tam gơl ală bă ù dềt tàm ală tiah ơm rềp tiah lơh bơtơ\t tơnau dơng dà. Bal mờ hơ\ là ai lài broă tam wơl brê.

Ai tam gơl ù lơh broă sa sươn sre nđờ, ù brê lời dùl êt wơl nđờ. Uă ngan bă ù tam kau su ờ huan geh cồng nha, jat a` pal tam wơl brê. Dilah ờ tam den lời brê in kis dờng wơl. Dilah ai tam gơl den mìng tam gơl dùl êt gời. Pal sền swì, tă bơsong kal ke ai mpồl lơh sa kă bro in mơya ờ go\ di tài jơnau kờ` lơh sa mờ lơh aniai tiah ơm kis. Tài bơh tiah ơm kis dờng màng rlau, geh priă digơlan kung ờ blơi geh sơl.

Ai gơnoar mpồl lơh sa kă bro in tam gơl bă kau su chơ\t ờ huan geh cồng nha tàm bă ù brê ờ gam chi che tàm Gia Lai là broă lơh nàng tă bơsong kal ke ai mpồl lơh sa kă bro in mơkung là nàng lơh geh jơnau kờ` sền gàr mờ bơtàu tơnguh brê. Mơya, mờ bồ tơngoh kơlôi sơnơng “priă cồng pa là broă bơh mpồl lơh sa kă bro dê, brê là broă càr dê”, den ờ hềt gi\t Gia Lai geh lơh bơta lơi nàng dong ală mpồl lơh sa kă bro klàs bơh bơta gơmu\t jrô bơh tờm kau su.

Cau mblàng Lơ Mu K’Yến