VOV4.K’ho- Ngai 29/12, Mpồl kwang bàng bơh Mpồl rơndap broă dà lơgar bơh ồng Hoàng Đăng Quang, Phó Kuang atbồ Mpồl rơndap broă dà lơgar lơh kwang atbồ mpồl neh geh dơ̆ lơh broă mờ Ƀan Thường vụ Tỉnh ủy Dăk Lăk bè broă lòt sền bơta geh ngan broă atbồ ƀiên cế. Tơngai bơh nam 2016 tus nam 2021, càr Dăk Lăk neh tơrmù rlau 10% kờp jơh khà ƀiên cế geh jàu mờ rơndap sap sèng wơl mpồl kuang bàng lơh broă dà lơgar jat jơnau sồr. Gùt càr tơrmù 466 nă cau tàm ƀiên cế ală anih lơh broă dà lơgar, tơrmù 4 rbô 377 nă cau lơh broă tàm ală anih lơh broă dà lơgar mờ tơrmù 543 nă cau tàm mpồl kwang bàng, kông cứk kấp xã.

Tàm dơ̆ lơh broă, ồng Hoàng Đăng Quang, Phó Kwang atbồ Mpồl rơndap broă dà lơgar sồr càr Dăk Lăk pơn jat tai kờp sền, bơ tơl, lơh sir kơnòl broă, gơnap gơnoar bơh tơl sở, mpồl, gah broă lơh, ală tiah dê nàng bơsong bơta gơ tàm rơndap rơndồl; đal git di gơnoar mờ kơnòl broă lơh, rơndap sap sèng ngạc kông cứk, ƀiên cế kông cứk. Pơn jat tai sap sèng mpồl kwang bàng lơh broă dà lơgar, tơrmù ƀiên cế bơh sơn rờp, kràñ cê ờ sồr lơh ndrờm bal tàm broă tơrmù ƀiên cế.

Cau mblàng K’Duẩn