VOV4.K’ho - Ngai òr (16/11), Mpồl tam klăc cau ùr ƀòn dờng Đà Nẵng bơyai lơh pơrjum cau ala măt cau ùr ƀòn dờng dơ̆ 14, tơngai bơh nam 2021 tus 2026. 5 nam do, kuang bàng, cau tàm mpồl cau ùr ƀòn dờng Đà Nẵng neh bơyai lơh uă broă lơh mùl màl, pơgồp bal geh cồng nha tàm broă lơh rài kis mpồl bơtiàn, tơmù rơƀah. Ală broă lơh “Cau ùr dong kờl bal tơnguh bơtàu lơh sa”, “Dong kờl cau ùr rơƀah”... geh lơh uă.

             Mpồl tam klăc cau ùr ƀòn dờng Đà Nẵng pơnyờ să dờp bồng bi bơh Thủ tướng Chính phủ

Pah nam, ală cấp, mpồl cau ùr ƀòn dờng Đà Nẵng neh dong kờl bal mờr 5 rơbô hìu rơƀah, hìu ndrờm mờ rơƀah sơrlèt mờ kal ke; git nđờ jơ̆t rơbô nă cau tàm mpồl cau ùr rơƀah geh bơto broă lơh, yal broă lơh ring niam. Mpồl cau ùr ƀòn dờng Đà Nẵng neh ai càn 50 rơbô hìu cau ùr in càn 1 rơbô 500 tơmàn đong nàng tơnguh bơtàu broă lkă bro, mŭt lơh broă. Đơs tàm Pơrjum dờng, ồng Nguyễn Văn Quảng, Bí thư Thành ủy Đà Nẵng đơng lam, tàm tơngai lơh broă tus, Mpồl cau ùr ƀòn dờng pal chồl pràn broă lam sồr ală mpồl cau ùr lơh jăt niam gùng dà broă lơh bơh Đảng, adăt boh lam bơh Dà lơgar.

Cau mblàng Ndong Brawl