VOV4.K’ho- Bơta mus kơl brê tàm Dak Lak gam gơlik geh kal ke ngan. Bơh bồ nam tus tŭ do, tàm Dak Lak neh gơlik geh 650 dơ̆ mus kơl brê, sơgràm ù brê, geh mờr nggùl tàm kờp jơh khà dơ̆ lơh tìs adat brê bơnơm tàm gùt lơgar dê. Bơta mus kơl brê, sơgràm ù brê tàm Dak Lak gam pal đơs ngan, uă bơta kal ke mus kơl brê jŏ jòng mơya  ờ hềt bơsong jơh.

Dùl ròt tiểu khu bơnah brê bơh Công ty TNHH MTV Lâm nghiệp Krông Bông (kơnhoàl Krông Bông, càr Dak Lak ), brê neh gơtìp mus kơl. Sền ngài mờ mat là ală dòr bơnơm tàm pơn jat sùm sền bal là neh gơtìp mus kơl jơh bơh jơng bơnơm tus bồ bơnơm. Lòt jat ală gùng lòt dềt mut tàm brê, rñih rñang ală bă brê pa gơtìp koh kơl, chu tơdau brê, dùl ròt ală chi dơm dờng, dơm dềt gơtìp koh kơl jơh, gơ pừ tàm sơlồng sơlàng tàm ù. Uă nggu chi pa gơtìp koh gơ pừ, bơta ơnàng tus 2 nă cau koar. Ồng Bùi Văn Hưng, Phó Kuang atbồ Công ty Lâm nghiệp Krông Bông  đơs.

Bơta geh ngan broă lơh atbồ sền gàr brê gơlik geh ngai sơlơ kal ke. Kuơ màng là Công ty Lâm nghiệp Krông Bông rềp nhàr bal mờ 2 kơnhoàl Ea Kar mờ M’Drak, gam ơm tàm nggùl đah tiah làng bol ơm kis bơh kòn cau H’mông dê ơm kis mờ pơgap 11 rơbô nă cau. Mơ tàm bă brê atbồ bơh công ty dê kung tàm bơr lŭ bal uă ngan mờ bă brê gơwèt bơta atbồ bơh UBND ală xã dê. Gơlam tus broă atbồ làng bol mut ờm lơh ală broă lơh mus kơl brê là kal ke ngan.

Mus kơl brê, sơgràm ù brê gam gơbàn uă ngan tàm uă tiah

6 nhai bồ nam, tàm Dak Lak gơlik geh 650 dơ̆ mus kơl brê, sơgràm ù brê tìs mờ kơrnoat den mìng is tàm Công ty Lâm nghiệp Krông Bông neh gơlik geh 425 dơ̆, lơh hoàc huơr pơgap 108 lồ brê, geh mờr 3/4 ală dơ̆ lơh tìs tàm gùt lơgar dê. Jat ồng Trần Văn Tùng, Hạt trưởng Hạt Kiểm lâm kơnhoàl Krông Bông yal, brê tàm Công ty Lâm nghiệp Krông Bông gơtìp mus kơl khat gơboh, pơn jat sùm mờ jŏ jòng bơta lơh tìs sơnrờp ngan là bơh cau tờm atbồ sền gàr brê dê.

Bơta mus kơl brê jŏ jòng bè do là tài bơh cau tờm atbồ, sền gàr brê ờ hềt jơh nùs atbồ. Công ty Lâm nghiệp Krông Bông geh dà lơgar jàu bă brê uă ngan mơya mpồl sùm drơng broă sền gàr brê dùl ết, tiah lơi hơ̆ ờ jơh nùs atbồ brê, bơh hơ̆ tàm bơnah brê bơh công ty dê atbồ neh gơlik geh sùm ală dơ̆ mus kơl brê, tơnhào dơm chi, tăc blơi phan brê sùm, pơn jat sùm mờ kal ke.

Bal mờ Krông Bông, bơta mus kơl brê kung gam gơlik geh kal ke tàm ală kơnhoàl bè Ea Súp, Cư M’gar mờ Ea H’leo. Ồng Nguyễn Văn Quyến, Phó Kuang atbồ dờng Công ty TNHH lơh gơlik phan sa mờ lơh broă brê bơnơm Dak Lak pà gĭt, mpồl neh geh jàu atbồ rlau 27 rơbô lồ brê mờ ù brê bơnơm tàm kơnhoàl Ea Sup. Bơta mus kơl brê, sơgràm ù brê tàm bơnah ù brê bơh công ty dê kal ke ngan. Bơh nam 2017 tus tŭ do, geh pơgap 400 lồ brê mờ ù brê bơh công ty dê gơtìp mus kơl, sơgràm ù brê neh geh lơh sră nggal. Mơya, geh ết ngan broă geh lùp khàu, lơh glài mờ broă lơh glài ờ hềt kràñ, ờ hềt lơh jơh nùs là jơnau tờm lơh cau mus kơl kơñau brê ngai sơlơ bơcrì bơcrà.

Ală cau mus kơl brê, sơgràm ù brê bơcrì ngan, jàñ bơsak ngan, rcang lài tam dră wơl mờ mpồl sền gàr brê bơh công ty dê. Ală dơ̆ lơh pờng, pơhìn mờ lơh aniai phan bơna, ală anih sền gàr brê bơh công ty dê den neh pơyoa sră nggal tus mờ ală anih lơh broă geh gơnoar, mơya tus tŭ do kung gam ờ hềt geh lơh glài sơl. Ngan là ală dơ̆ sơgràm ù brê lơh hìu, lơh hìu rơnŭ tàm bă brê bơh công ty dê neh geh uă.

Gam geh bơta ờ hềt jơh nùs atbồ tàm uă cau tờm brê dê tàm Dak Lak

Tàm tŭ hơ̆, ồng Ngô Văn Thắng, Phó chủ tịch UBND kơnhoàl Ea Súp đơs là, bơta mus kơl brê tàm ù tiah gơlik geh kal ke tài bơh jơnau gơbàn uă ngan là bơh broă ờ hềt jơh nùs atbồ, ờ hềt lơh jơh kơnòl bơh cau tờm brê dê mờ jơh bal ală anih lơh broă geh gơnoar dê sơl, ngan là bă brê neh jàu ai ală mpồl lơh sa kă bro in.

Bơta geh ngan tàm ù tiah do dê broă kơryan, broă lơh glài mus kơl brê, broă lơh glài ù brê gơtìp sơgràm tìs mờ adat boh lam gơtìp uă ngan kal ke. Mờ gam geh tềl tơngŏ ờ hềt jơh nùs tàm broă atbồ, sền gàr brê. Uă mpồl lơh sa kă bro ờ jai bơt bơtàu mpồl sùm drơng broă sền gàr brê, halà dilah geh den mpồl lơh broă kung ờ tơl pràn nàng lơh broă lơh atbồ, sền gàr brê.

Neh 7 nam Chính phủ sồr til mpồng brê mờ lơh jat ală broă lơh jal mhar sền gàr brê geh is. Mơya, bơta geh ngan tàm Dak Lak pà gŏ, ală broă lơh sền gàr brê kung gam ờ hềt lơh geh cồng nha, mus kơl brê, sơgràm ù brê kung gam gơlik geh uă tiah. Bơta geh ngan pà gŏ, gam geh bơta ờ hềt jơh nùs atbồ bơh uă cau tờm brê mờ uă kấp, uă gah lơh broă dê. Tàm tŭ hơ̆, broă lơh glài kơnòl broă kung ờ hềt kràñ, lơh glài lơh tìs ờ hềt jơh nùs, gơlam tus uă tiah gơ gơs tiah mus kơl brê uă. Bơta do jŏ jòng tàm uă nam lơh broă atbồ ală bơta lơh tìs tàm broă atbồ, sền gàr brê ngai sơlơ kal ke, sồr pal geh bơta mut lơh bal bơh uă kấp, uă gah mờ bơta kràn cê jơh nùs, bơsong jơh den hơ̆ sồng gơtùi kơryan bơta mus kơl brê.

Cau cih Công Bắc- Cau mblàng K’Hạnh