VOV4.K’ho- Drim do, 31/12, pơrjum dờng dơ̆ 11 Mpồl cau lơh ƀău Việt Nam, tơngai lơh broă bơh nam 2020 tus nam 2026 ngan ngồn mut lơh. Rlau 550 nă cau ala mat rlau 27 rbô nă cau tàm mpồl cau lơh ƀău gơ wèt 63 mpồl cau lơh ƀău càr, ƀòn dờng, 19 ci hội mờ rlau 200 ci hội gơ wèt Mpồl cau lơh ƀău Việt Nam tus bal pơrjum. Lài hơ̆ tàm dơ̆ pơrjum rơcang lài, Củ tịc Mpồl cau lơh ƀău Việt Nam ồng Lê Quốc Minh sồr ală cau ala mat tus bal pơrjum tơnguh bơta làng bol lơh tờm gơ jat bal mờ tơnguh nùs nhơm geh kơnòl, lơh jat kơrnuat tàm broă cribơyai, tĕ khà tàm pơrjum. Ală tơngume cribơyai tàm pơrjum mờ ală kơnòl broă, broă lơh bơh pơrjum ai tơlik geh kuơ ngan ngồn pơgồp bơnah tơnguh rài lơh ƀău kac màng Việt Nam bơtàu tơnguh jat gùng dà tam gơl pa, mờng chài, niam chài, rơcang lài mut gơ rờm bal mờ sră ƀău ală lơgar rềp bal mờ dunia, cih dờp geh sac rơ wah niam chài dunia di mờ niam chài jơi bơtiàn Việt Nam dê.

Cau mblàng K’Duẩn