VOV4.K’ho- Drim ngai 29/6, Hội đồng Nhân dân càr Gia Lai khóa 12, tơngai lơh broă bơh nam 2021 tus nam 2026 neh mut pơrjum dơ̆ 1. Do là dơ̆ pơrjum geh gơtha dờng màng ngan, sơn đờm broă lơh ngan ngồn sơn rờp bơh Hội đồng Nhân dân càr mờ gơnoar atbồ càr Gia Lai dê tơngai lơh broă bơh nam 2021 tus nam 2026.

Tàm dơ̆ pơrjum do, Hội đồng Nhân dân càr geh sền sơwì, lơh nền 2, 3 tơngume kuơmàng, geh: Jơnau yal tĕ khà kuang bàng Hội đồng Nhân dân càr mờ jơnau yal cồng nha dờp gơnoar broă kuang bàng Hội đồng Nhân dân càr khóa 12, tơngai lơh broă bơh nam 2021 tus nam 2026; geh kơrnuat crơng gơs Ban Dân tộc Hội đồng Nhân dân càr mờ bơyai lơh pồ ală gơnoar broă đơng lam bồ tờm bơh gơnoar atbồ kấp càr khóa 12; iat Ủy ban Mặt trận dà lơgar Việt Nam yal tơrgùm jơnau đơs, jơnau dan bơh cau tĕ khà dê tàm ală dơ̆ tìp mat đah cau tĕ khà mờ cau tơlik mat tĕ khà kuang bàng Hội đồng Nhân dân càr khóa 12, tơngai lơh broă bơh nam 2021 tus nam 2026; sền sơwì, lơh nền Broă rơndap lơh bơyai lơh ală dơ̆ pơrjum ờs mờng nam 2021 bơh Hội đồng Nhân dân càr khóa 12.

Cau mblàng K’Duẩn