VOV4.K’ho- Drim ngai 07/12, tàm hìu pơrjum Ngọc Linh, ƀòn dờng Kon Tum, Hội đồng Nhân dân càr Kon Tum khóa 12 mut lơh pơrjum dơ̆ 2. Tàm pơrjum do, Hội đồng Nhân dân càr Kon Tum geh sền sơ wì, cribơyai mờ lơh nền uă tơngume kuơmàng gơ wèt gơnoar Hội đồng Nhân dân càr dê.

Jơnau yal bơh Ủy ban Nhân dân càr Kon Tum dê tàm pơrjum ai gŏ, bulah pal kong mờ uă kal ke, bơta lòng mờ gơ rềng bơh kòp Covid-19, mơya nam 2021, broă lơh sa- mpồl bơtiàn càr Kon Tum dê kung gam lơh geh ală cồng nha kuơmàng, bè: Kờp jơh phan lơh gơs mpồl bơtiàn gơguh 6,47%; rơndap tap sèng lơh sa tam gơl di gùng di dà; priă lơh geh kờp bal tàm dùl nă cau geh 47 tơlak đong; tă dia geh 3 rbô 500 tơmàn đong, geh 100% khà kờp dŭ càr jàu; Càr geh tai 8 xã tơl khà ƀòn lơgar pa; khà hìu bơnhă rƀah gơmù 4% pơndrờm mờ nam 2020; broă lơh rơcang sơndră kòp Covid-19 geh lam lơh jơh nùs.

Tàm 2 ngai mờ nggùl geh lơh pơrjum dơ̆ 2, Hội đồng Nhân dân càr Kon Tum geh lời uă tŭ tơngai nàng ală kuang bàng mblàng lơh loh jơnau bơh tài mờ 2, 3 jơnau kờñ geh jàu nam 2021 dê ờ lơh geh jat bè broă rơndap lơh, bè: khà mpồl lơh sa kă bro crơng gơs pa mìng geh mờr 80%; bă ù kơnuh sơnơm Ngọc Linh tam pa mìng geh mờr 67%... Mờ kung tơrgùm cribơyai ring bal jơnau kờñ, kơnòl broă mờ ală broă lơh bơtàu tơnguh lơh sa mpồl bơtiàn, sền gàr dà lơgar, sền gàr lơngap lơngai nam 2022.

Cau mblàng K’Duẩn