VOV4.K’ho- Drim ngai 27/4, tàm hìu lơh broă Quốc hội, mut pơrjum dơ̆ 55 bơh Ủy ban Thường vụ Quốc hội dê. Geh lơh tàm 1 ngai, pơrjum dơ̆ do bơh Ủy ban Thường vụ Quốc hội dê ai jơnau đơs bơh sơn rờp bè broă rơcang tus pơrjum dơ̆ 1, Quốc hội khóa 15. Ủy ban Thường vụ Quốc hội sền sơ wì, lơh nền bè rơndap broă ngui tềm pềr tă dơ̆ ngui mờ priă jền gam wơl bơh kes priă dà lơgar nam 2020 dê. Sền sơ wì cồng nha pơrjum dơ̆ 11, Quốc hội khóa 14 mờ ai jơnau đơs bơh sơn rờp bè broă rơcang tus pơrjum dơ̆ 1, Quốc hội khóa 15. Sền sơ wì, lơh nền broă pơn jat tai ngui khà priă gam wơl bơh Nghị quyết sồ 324 bơh Ủy ban Thường vụ Quốc hội khóa 14 dê nàng bơcri lơh ală rơndap broă lơh anih ala mat lơgar Việt Nam tàm lơgar ndai tàm tơngai bơh nam 2021 tus nam 2025. Sền sơ wì, lơh nền broă bơtơl priă jền blơi sơnơm vaccine, sơnơm lơh kloh khuẩn mờ gar sơntìl chi tam dà lơgar. Kung tàm dơ̆ pơrjum do, Ủy ban Thường vụ Quốc hội sền sơ wì, lơh nền broă crơng gơs, tam gơl nhàr ù tiah 2, 3 mpồl hành chính tàm 5 càr, ƀòn dờng, geh: Hà Nội, Thừa Thiên Huế, Thanh Hóa, Đồng Nai, Tuyên Quang.

Cau mblàng K’Duẩn