VOV4.K’ho- Drim ngai 14/12, pơrjum pah nam Cribơyai Nghị viện câu Á- Thái Bình Dương dơ̆ 29 (APPF-29) bơh Quôk hội lơgar Hàn Quôk đơng lam bơyai lơh jat broă lơh pờ tơlik tơn tàm internet neh geh mut lơh yŭ rơyùm. Tus bal pơrjum geh mờr 150 nă kuang ala mat tus bơh ală Nghị viện geh jơng tàm APPF, kuang bàng gròi sền mờ ală cau nac geh jà. Mpồl kuang bàng Quôk hội Việt Nam bơh Củ tịc Quôk hội ồng Vương Đình Huệ lơh kuang atbồ mpồl neh tus bal pơrjum.

Đơs gờm chờ pơrjum, Kuang atbồ lơgar Hàn Quôk ồng Moon Jae-in đơs nền, ală nghị viện geh gơnoar broă dờng màng ngan, ala mat ai jơnau đơs bơh làng bol dê, tơnguh ală broă lơh kờñ lam ală lơgar rê wơl bơta bè ờs. Ồng Moon Jae-in hòi jà, ală nghị viện APPF ai tơnggŏ gơnoar broă đơng lam bồ tàm broă rơcang lài ai dùl rài pa in; mờ kung ai tơnggŏ bơta kơp kờñ, pơrjum APPF-29 geh lơh geh cồng nha niam, pơgồp bơnah gàr kơ̆ lơh broă bal nghị viện uă lơgar bal mờ gơp tam klac bal, lơh broă bal bơtàu tơnguh wơl tơnơ̆ kòp dờng tài dùl rơnàng tơnơ̆ do niam bơnĕ rlau, đơs nền bơta pràn bơh lơh broă uă lơgar dê tàm tơngai tŭ do.

Cau mblàng K’Duẩn