VOV4.K’ho- Tàm pơrjum pờ tơlik tơn tàm internet gùt lơgar tơn jơh Tổng kụk rơcang sơndră trồ tiah lơh aniai- Cơldŭ lơh broă sùm Mpồl đơng lam dà lơgar bè rơcang sơndră trồ tiah lơh aniai nam 2021 mờ lam lơh kơnòl broă nam 2022 geh lơh tàm mho ngai 30/12 tàm Hà Nội, ală kuang bàng ring bal đơs, pal jơh nùs mờ geh cồng nha rlau tềng đap ală broă gơlik geh nisơna bơh trồ tiah lơh aniai dê.

Nam 2021, trồ tiah lơh aniai gơlik geh tàm gùt plai ù mờ broă gơlik geh nisơna, kơn jơ̆ ngan lơh gơbàn hoàc huơr dờng ngan bè kòn bơnus mờ phan bơna. Tàm lơgar he neh gơlik geh 841 dơ̆ trồ tiah lơh aniai mờ 18 bơta trồ tiah lơh aniai tàm khà 22 bơta trồ tiah lơh aniai. Trồ tiah lơh aniai neh lơh 108 nă cau chơt, roh thit; kờp dŭ hoàc huơr rlau 5 rbô 200 tơmàn đông. Sền wơl ală bơta ờ niam kung bè ai tơlik broă lơh rơcang sơndră trồ tiah lơh aniai tàm nam 2022 geh cồng nha di mờ bơta geh ngan, ală kuang bàng đơs là, kòp Kovid-19 pơn jat tai gơlik geh kal ke, ală bơta trồ tiah lơh aniai dờng bè càl rbut, dà kŏ dà cò, ngơr bam, trồ prang dờng soat dà, tơrluh ù... neh sơrlèt rlau mờ tơngai kah yau tàm nam 2021 pơn jat tai là jơnau pơhìn gơ rềng tus lơgar he, kơnòl broă rơcang sơndră jơnau gơ lời wơl bơh trồ tiah lơh aniai ai tơlik ngai sơlơ kơn jơ̆ bè hơ̆ den tàng pal tơnguh cồng nha mpồl kwang bàng lơh broă rơcang sơndră trồ tiah lơh aniai bơh kấp hơđơm. Jat hơ̆, sơlơ bơto bơtê, tơnguh pràn jak lơh broă ai kwang bàng rơcang sơndră trồ tiah lơh aniai in, ngan là mpồl lam lài tàm kấp hơ đơm.

Cau mblàng K’Duẩn