VOV4.K’ho– Kơnòm bơsram gùt lơgar neh mut tàm nam bơsram pa 2021- 2022. Bulah ală tiah ndrờm đal git geh lơh ngan bơsong kal ke tài bơh kòp Covid-19 nàng lam lơh bơto bơtê mờ bơsram dipal, mơya kung gam tơl bơta kơlôi rơcang gơ wèt tus mờ ală hìu bơsram mờ kơnòm bơsram.

Ƀòn dờng Hồ Chí Minh, gam là tiah tờm gơbàn kòp Covid-19 bơh gùt lơgar dê, bulah gơnoar atbồ mờ gah lơh broă geh gơnoar neh đal git geh lam lơh bơto bơtê mờ bơsram pờ tơn tàm internet tus jơh học kỳ 1, mơya broă pơndiang, tac sră măi tus kơnòm bơsram in gam gơtìp kal ke. Tàm hơ̆, sră măi ơdŭ 1, ơdŭ 2 mờ ơdŭ 6 jat broă lơh bơto bơsram phổ thông pa, ală mpồl mìng pa rơp tac geh rlau 60% khà sră tus ală hìu bơsram. Den tàng, bal mờ broă jòi broă lơh tac sră tus kơnòm bơsram in, ală quận, kơnhoàl mờ ală hìu bơsram pal ai sră măi điện tử bơh ơdŭ 1 tus ơdŭ 12 tàm internet ai kơnòm bơsram in nàng ngui ing tàm tơngai bồ nam bơsram. Ồng Dương Anh Đức, Phò Chủ tịch Ủy ban Nhân dân ƀòn dờng Hồ Chí Minh pà git: “Ƀòn dờng sồr ală hìu bơsram git jơnau tơnggit tơl nă mè bèp kơnòm bơsram, git loh bè rài kis hìu bơnhă bơh tơl nă kơnòm bơsram dê nàng tơrgùm kờp ală oh geh bơta kal ke bè gùng pờ internet tàm broă bơsram tàm internet. Bơh hơ̆ geh broă lơh ngan ngồn dong kờl bè: tơrbŏ bal ală cau geh nùs nhơm niam dong kờl priă jền, măi mok kơnòm bơsram in, pơyua ală sră bơsram, sră nggal nàng kơnòm bơsram in bơsram is. Ală kơnòm bơsram do geh sền sơ wì mờ gròi sền bơto bơtê is tŭ gơtùi lòt bơsram tơn”.

Neh là nam dơ̆ 3 gah bơto bơsram lam lơh bơto bơtê mờ bơsram pờ tơn tàm internet tàm tŭ tơngai sơndră kòp Covid-19, mơya ală tiah ndrờm đơs là, ờ gơtùi lam lơh bơto bơsram pờ tơn tàm internet jŏ jòng sùm, tài geh gơ rềng tus cồng nha bơto bơsram, pràn kơldăng să jan mờ nùs nhơm bơh kơnòm bơsram dê, kuơmàng là kấp mầm non mờ kấp 1. Broă kơnòm bơsram pal bơsram pờ tơn tàm internet kung lơh gơguh uă bơta kal ke mè bèp in tŭ pal blơi tai ală bơta măi mok drơng bơsram tơn tàm internet tàm tŭ tơngai priă jền lơh geh gơmù tài gơ rềng bơh kòp Covid-19. Kuơmàng, broă lơh do kal ke, dilah ờ kờñ đơs là ờ gơtùi lam lơh tàm ală tiah kơh bơnơm, tiah mờ raì kis lơh sa, mpồl bơtiàn gam uă kal ke. Bè hơ̆ den tàng, uă tiah dan ală gah lơh broă geh gơnoar kơlôi sơnơng, cit lài sơnơm vaccine ai mpồl cau pơgru mờ kơnòm bơsram gùt lơgar in. Ồng Vũ Đại Thắng, Bí thư Tỉnh ủy Quảng Bình geh jơnau đơs: “Kòp Covid-19 kung gam gơlik geh kal ke, bol he tŭ do gam lam lơh broă lơh cit sơnơm vaccine ai jơh gùt làng bol in. Bol hi sền gròi uă ngan nàng broă bơsram bơh ală kơnòm bơsram dê ƀuơn ƀuài den digơlan bol he kung pal kờp dŭ tus broă geh broă lơh cit sơnơm vaccine tàm hìu bơsram ai ală kơnòm bơsram in, ngan là kơnòm bơsram kấp 3”.

Kòp Covid-19 gơlik geh kal ke tàm nam 2020 mờ 8 nhai nam 2021 kung lơh gơ rềng tus broă lam lơh broă lơh bơto bơsram phổ thông pa tàm uă tiah, ngan là kal ke tàm broă rơndap ai priă jền blơi phan bơna, măi mok bơto bơsram. Tàm pơrjum gùt lơgar tơn jơh nam bơsram mờ lam lơh kơnòl broă nam bơsram pa bơh gah Giáo dục mờ Đào tạo dê pa do, 2, 3 tiah dan ală anih lơh broă atbồ sền sơ wì, tơn ruc tơngai lam lơh broă lơh bơto bơsram phổ thông pa gơ wèt tus mờ ơdŭ 10. Ồng Nguyễn Đức Trung, Chủ tịch Ủy ban Nhân dân càr Nghệ An geh jơnau dan: “Dan Bộ Giáo dục sền sơ wì, yal bơta geh ngan mờ sền sơ wì tơn ruc tơngai lam lơh broă lơh sră măi ơdŭ 10 bơh nam 2022- 2023 tus nam bơsram 2025- 2026 mờ 2 jơnau. Dùl là tŭ do gam là tơngai bơtờp kòp Covid-19 den tàng càr ờ hềt geh tơl bơta pràn nàng rơcang lài, ngan là bơt bơtàu broă lơh sră măi, hơ̆ sồng bơto bơtê mpồl cau lơh broă, bơta do kung kal ke ngan tus mờ càr. Dơ̆ 2 là nàng gàr bơta ring bal nam do bol he sơn đờm ngui sră măi ơdŭ 6, nàng tus 3 nam tai den bol he lam lơh tus ơdŭ 10 den geh dipal rlau, gàr bơta niam, geh bơta ring bal rlau”.

Mò Nguyễn Thị Quyên Thanh, Phó Chủ tịch Ủy ban Nhân dân càr Vĩnh Long đơs là: “Kơnòm bơsram ơdŭ 9 nam do lòt bơsram tàm bơta kòp gơlik geh kal ke. Tŭ bol he ai tơlik rơndap broă bơto bơtê jơnau git wă tờm, là broă lơh bơto bơsram phổ thông tŭ do, bè hơ̆ den nam tơnơ̆ tŭ ală oh sơn đờm mut tàm broă lơh bơto bơsram phổ thông pa den ală oh geh tơl bơta pin dờn mờ tàm pơ dờn nàng gơtùi sơn đờm halà ờ. Bol hi dan Bộ sền sơ wì nền nòn, tài bơh bơta kuơ bơh ală kơnòm bơsram dê bè cồng nha bơsram tŭ lam lơh broă lơh bơto bơsram phổ thông pa, bơh hơ̆ sền sơ wì mờ dan Quốc hội tam gơl Nghị quyết sồ 51”.

Bulah git là tàm tŭ tơngai dà lơgar gam uă kal ke tài bơh kòp Covid-19, uă bơta broă lơh ờ hềt gơtùi bơsong mơ, mơya kơp kờñ ngan ală anih atbồ, gơnoar atbồ mờ gah bơto bơsram kấp hơ đơm jòi broă lơh tă bơsong nàng kơnòm dềt in geh tus hìu bơsram nàng bơsram dră tàm bơta ờdo ờdă kòp bơtờp mờ kis bal mờ kòp bơtờp jŏ jòng.

Cau mblàng K’Duẩn