VOV4.K’ho- Nam bơsram pa 2021- 2022 mờr tus rềp ngai, mơya kòp bơtờp pơn jăt tai gơbàn kal ke ngan. Uă càr mờ ƀòn dờng neh geh gùng dà bơyai lơh dơ̆ sơnđờm mŭt nam bơsram pa geh lơh tơn tàm internet mờ bơto bơsram pờ tơlik tơn tàm internet. Gơwèt mờ kơnòm bơsram kấp 2, kấp 3 digơlan là neh rơhời mờng quèng mờ mhar ngan bơsram gơtùi gơwèt mờ broă bơsram pờ tơlik tơn tàm internet tàm nam bơsram pa. Mơya, gơwèt mờ kơnòm bơsram kấp dùl, uă mè bèp ờ pleh klàs jơnau kơlôi rơcăng ai “tơngai tam gơl” bơh sơnrờp bơh oh kòn he dê. Nàng gĭt wă loh rlau bơta gơrềng bơh kòp bơtờp dê gơwèt mờ ală oh là kơnòm bơsram ơdŭ 1 mờ bơto pơlam bơh Bộ Giáo dục mờ Đào tạo dê, cau lơh ƀăo Anih Jơnau đơs Việt Nam neh geh dơ̆ lùp ồng Thái Văn Tài, Kuang ătbồ Vụ Bơto bơtê kấp dùl, Bộ Giáo dục mờ Đào tạo.

Ơi, niam să ồng! Kòp Covid-19 gam geh ală bơta gơbàn ngai sơlơ kal ke tàm uă càr mờ ƀòn dờng. Bàr pe càr, ƀòn dờng lơh nền tơngai lòt tus hờ hìu bơsram là tàm ngai 01/9, ai bàr pe càr, ƀòn dờng ndai den tơn rŭc wơl ngai lòt hờ hìu bơsram tài bơh ờ hềt gơtùi gĭt geh lài bơta gơbàn bơh kòp Covid-19 dê. Ồng gơtùi pà gĭt broă rơndăp lơh nam bơsram bơh kơnòm bơsram kấp dùl dê, ngan là kơnòm bơsram ơdŭ 1 gơtìp gơrềng bè lơi?

Ồng Thái Văn Tài: Tàm tŭ ai ngui pơgăp tŭ tơngai nam bơsram den Bộ Giáo dục mờ Đào tạo neh kơlôi tus bơta dipal bơh tŭ tơngai nam bơsram nam do dê gơwèt mờ kấp dùl mờ gơwèt mờ ơdŭ dùl bè lơi rao. Mìng is gơwèt mờ kấp dùl den ală tiah geh bơta rơcăng lài mờ dipal uă rlau. Tàm gơnăp gơnoar bơh Ủy ban Nhân dân càr dê gơtùi lơh nền ngai lòt hờ hìu bơsram mờ ngai tơn jơh nam bơsram dê, tàm pơgăp tŭ tơngai tam gơl là gờñ rlau halà jơla rlau pơndrờm mờ pơgăp tŭ tơngai broă rơndăp lơh nam bơsram là 15 ngai. Bè hơ̆, den mờ tŭ tơngai bè hơ̆, ală tiah gơtùi lơh nền tŭ tơngai ală oh tus hờ hìu bơsram nàng bơsram sră tàm tơl ƀòn lơgar loh làng, geh tŭ là tus tơl hìu bơsram. Tàm ală tiah lơi gam là tiah ờ hềt bơtờp kòp den bol he pơn jăt tai ai kơnòm bơsram in tus hờ hìu bơsram. Ală tiah lơi gam geh pơhìn bơtờp kòp den bol he pal geh bơta ai lài khà dùl ai pràn kơldang să jan mờ ờdo ờdă bơh ală oh dê. Den tàng bè hơ̆, gơwèt mờ ală kơnòm bơsram ơdŭ 1 den bơdìh mờ broă sền gàr pơgăp tŭ tơngai bè hơ̆, den bơta mùl gŏ is bơh ală kơnòm bơsram ơdŭ dùl dê là bol he pal sền ngăc ngan tus cồng nha mờ bơta bồ tơngoh ờ hềt geh rơcăng lài ai broă bơsram, tam gơl anih bơh mầm non tus kấp dùl.

Ồng Thái Văn Tài- Kuang ătbồ Vụ Bơto bơtê kấp dùl, Bộ Giáo dục mờ Đào tạo 

Bè ồng pa pà gĭt, den cau là kơnòm bơsram ơdŭ dùl là cau dờng màng ngan gĭt lơh. Ală oh tam gơl anih bơsram bơh mầm non tus kấp dùl mơya tàm bàr pe tiah ală oh pal kong tai mờ bơta gơrềng bơh kòp Covid-19 dê den tàng ờ hềt gơtùi bal mờ pơgru mờ ală bơyô lòt tus hờ hìu bơsram tơn ờ. Bè hơ̆, Bộ geh bơta tơngkah lơi gơwèt mờ ală oh là kơnòm bơsram ơdŭ dùl tàm nam bơsram do, ơ ồng?

Ồng Thái Văn Tài: Bè đah broă lơh ờs mờng, bol he neh ai ngui sră nggal bơto pơlam lơh broă rơndăp lơh hìu bơsram, broă rơndăp lơh nam bơsram. Gơwèt mờ cau pơgru den broă lài ngan bol he pal rơcăng lài geh broă rơndăp lơh môn bơsram, ai lài tàm ơdŭ dùl in ai ală môn bơsram gơcèng bơta bơnàng jă bơh sơnrờp bè môn dà Yoan, môn Toán. Ai tàm rơndăp ală môn bơsram ndai den bol he bơtòm tơrgùm nàng lơh bè lơi tơrmù tŭ jiơ nàng nàng ală oh lời tŭ jiơ ai ală môn bơsram gơcèng bơta bơnàng jă bơh sơnrờp in. Mờ dùl bơta pal jăt tai là bol he ngui jơh tŭ tơngai niam nàng tơnguh tŭ tơngai bơsram tơn ai ală kơnòm bơsram ơdŭ dùl in. Mờ dilah tàm tŭ digơlan kòp gơbàn jŏ jòng, kơnòm bơsram bơsram tàm hìu jŏ jòng den bol he lơh jăt jơnau đơs “ơm lòt tus hờ hìu bơsram mơya ờ ơm bơsram”. Mờ gơwèt mờ kơnòm bơsram ơdŭ dùl, ơdŭ 2, den bol he pal sền ngăc tus broă lơh đòm jăt chài ngan ngui măy mok yal tơngĭt jơnau nàng lơh bè lơi ƀươn ngan rlau jơh ai mè bèp in, ƀươn soh ngan rlau jơh ai kơnòm bơsram in mờ lơh jăt jơnau kờñ là gàr bơta mờng quèng bơsram sră. Dong kờl dùl bơnah lơi hơ̆ tàm broă bơsram sră nàng lơh gơs bơta mờng quèng lơh sùm broă bơsram sră mờ ală bơta gĭt wă gơcèng bơta kuơmàng, tờm ngan.

Tềng đăp bơta kòp bè do, digơlan kơnòm bơsram geh pơn jăt pal bơsram pờ tơlik tơn bơh tàm internet tŭ ờ gơtùi lòt tus hờ hìu bơsram nàng bơsram tơrgùm bal. Bè hơ̆, mơya bơsram pờ tơlik tơn bơh tàm internet gơwèt mờ kơnòm bơsram kấp dùl là bơta kal ke ngan. Bộ Giáo dục mờ Đào tạo geh bơta tơngkah lơi gơwèt mờ ală tiah, ngan là ală ƀòn lơgar kal ke bè măy mok yal tơngĭt jơnau, ơ ồng?

Ồng Thái Văn Tài: Bộ Giáo dục mờ Đào tạo neh geh dùl ƀơnah jơnau bơto geh 51 khà ndrờm bal mờ 51 tơngume bơsram sră tàm tivi mờ geh pờ tơlik làm uă tàm ală pang internet mpồl bơtiàn nàng dong ală oh là kơnòm bơsram in tàm tơngai ơm tàm hìu den bol he ngui 51 tơngume bơsram sră do, gơtùi ngui ai jơh ală bộ sră giáo khoa krơi is in. Mờ cau pơgru, hìu bơsram pal bơto pơlam mè bèp kơnòm bơsram in tàm tŭ tơngai ơm tàm hìu den ai lài ai bơsram dà Yoan bơh măy mok do. Bơta dơ̆ bàr, là ală tiah ƀòn lơgar kal ke den bol he lơh uă ală broă lơh bơto bơsram. Gơtùi pà sră, halà bơh ală dơ̆ tơm bơh bơr đah ală ƀòn lơgar nàng lơh bè lơi gàr sùm ală oh tàm ală tŭ bơsram is. Mờ bol he ndrờm gĭt là, dilah bol he lơh chài, lơh niam den do kung là tŭ tơngai niam nàng dong ală oh bơsram sră is mờ pơgồp bal mờ mè bèp kơnòm bơsram rềp mềl rlau mờ bol he.

Đơs wơl là bol he pal ngui jơh tŭ tơngai niam nàng ai lài ai kơnòm bơsram ơdŭ 1, ơdŭ 2 in. Tàm jơnau krơi is, dilah bè dùl ƀòn lơgar lơi hơ̆ mờ tàm pơgăp tŭ tơngai ai gơnoar, bol he ờ gơtùi lơh gơs broă lơh nam bơsram dê den ƀòn lơgar yal mờ Bộ nàng tơn jŏ tai pơgăp tŭ tơngai nàng pơn jăt tai ai broă do in. Bol he ai lài ai bơta cồng nha in, ai lài ai sơnam deh in, pleh broă lơh dùl bă kră kơldang mờ pleh broă lơh dùl bă đah bơdìh lơm gơlam tus broă lơh gơrềng tus cồng nha mờ nùs nhơm bồ tơngoh bơsram sră bơh ală oh dê.

Ơi, dan ưn ngài ồng Thái Văn Tài- Kuang ătbồ Vụ Bơto bơtê kấp dùl, Bộ Giáo dục mờ Đào tạo neh tus bal mờ dơ̆ lùp do.

Jăt VOV1- Cau mblàng Lơ Mu K’Yến