VOV4.K’ho- Tàm nùs nhơm chờ hờp chờ hờñ wèt tus ngai chờ dà lơgar dê, cau tĕ khà gùt lơgar geh ià tàm tê sră pồ nàng sac rơwah Kuang bàng ala mat bơh he dê tàm Quốc hội mờ Hội đồng Nhân dân ală kấp, ồng Vương Đình Huệ Chủ tịch Quốc hội, Chủ tịch Mpồl duh rboă tĕ khà dà lơgar neh hơ jơnau lùp bơh cau lơh băo dê.

Chủ tịch Quốc hội tơngŏ bơta kơ̆p kờñ, cau tĕ khà gùt lơgar sền gĭ nền cê bè tơl nă cau tơlik mat tĕ khà, ngac ngar sac rơwah ală Kuang bàng ngan ngồn jak chài, ngan ngồn di pal, pơgồp bơnah tơnguh uă bơta niam mờ geh cồng nha lơh broă bơh ală anih lơh broă làng bol pồ dê, bơt bơtàu dà lơgar Việt Nam pràn kơl dang, lơh sir ală jơnau kờñ kuơ màng mờ Đảng he neh đơs tàm Nghị quyết Pơrjum dờng cau ala mat gùt lơgar dơ̆ 13.

Chủ tịch Quốc hội đơs ngan, ngai 23/5/2021 là dùl ngai dờng màng ngan bơh dà lơgar he dê, ngai mờ cau tĕ khà gùt lơgar lơh jat gơnoar lơh tờm, ià tơn sră pồ să tờm he sac rơ wah Kuang bàng he dê. Bơta sac rơwah bơh cau tĕ khà dê lơh nền jơh lơm cau tơlik mat tĕ khà lơi gơ gơs là Kuang bàng Quốc hội, Kuang bàng Hội đồng Nhân dân ală kấp, cau lơh nền bơta niam, geh cồng nha lơh broă bơh ală anih lơh broă làng bol pồ dê.

Cau mblàng K’Hạnh