VOV4.K’ho - Tàm kơnhoàl Ea Kar mờ ƀòn dờng Buôn Ma Thuột, càr Dak Lak pa geh bơyai lơh ngai chờ ai ntờc mhàm phồng dong kờl dong kờl is Tây Nguyên nam 2021. Geh gĭt nđờ rơbô nă làng bol neh lơh jăt nền nòn ală kơrnoăt rơcang sơndră mờ kòp gơtờp, tăp sèng jòng nàng kơ̆p tus ai mhàm dong kờl.

Ngai chờ ai ntờc mhàm phồng dong kờl is Tây Nguyên nam 2021 là broă lơh nàng dờp bal mờ broă lơh ală ntờc mhàm phồng-kàl rơlô bơkang nam 2021 mờ broă lơh pơrhê dơ̆ 8 geh Mpồl đơng lam dà lơgar lam sồr ai mhàm dong kờl is lam sồr. Mờ gùng dà broă lơh “Tơl ntờc mhàm geh ai-Dùl rài kis ơm wơl”, bŭ lah bơta kòp gơtờp gam gơtìp kal ke tàm uă tiah, làng bol kis tàm càr Dak Lak gam tus bal ai mhàm dong kờl is gal ngan.

                      Anih ai mhàm dong kờl is geh lơh tàm tiah ờ do ờ dă sơndră mờ kòp gơtờp

Ală cau ndrờm nền nòn lơh jăt jơnau sồr 5K bơh Bộ Y tế, tăp sèng jòng kơ̆p tus tŭ mŭt lơh jăt ală broă dan cih măt. Bi Trương Văn Lợi, lơh broă tàm Đah Hải quan càr Dak Lak pà gĭt: “Dờp bal jơnau hòi jà bơh Mpồl đơng lam công đoàn den să tờm añ kung tus bal ai mhàm dong kờl bal mờ gùt lơgar nàng kơrian kòp Covid-19 gơtờp. Tus bal ai mhàm den kung rơcang sơndră mờ kòp jăt jơnau sồr 5K. Bơh tơl dơ̆ ai mhàm dong kờl den añ kung kơ̆p kờñ pơgồp bal ai ntờc mhàm prăp gàr dong kờl ală cau gơtìp ờ bơtoah in”.

Tàm dơ̆ ai mhàm dong kờl do ờ mìng geh làng bol kis tàm ƀòn dờng Buôn Ma Thuột mờ gam geh uă cau tus bơh ală kơnhoàl rềp bal tus bal. Lŏ Nguyễn Thị Hương, cau pơgru bơto tàm hìu bơsram cấp 3 Quang Trung, kơnhoàl Krông Păc, càr Dak Lak neh tus bơh gờñ yal: “Pah nam añ tus bal ală dơ̆ lam sồr ai mhàm dong kờl bơh ală cấp den pah nam añ tus bal ai mhàm dong kờl bơh 2 tus 3 dơ̆ jăt bơta ai bơh bơta pràn kơl dang să jan dê. Ngai do, tus bal ai mhàm dong kờl den añ geh công đoàn hìu bơsram sồr tus lơh broă sơndră mờ kòp mờ să tờm añ kung ndrờm bal mờ ală đoàn viên ndai tàm hìu bơsram sơl tus bal sơndră mờ kòp niam, gàr niam jơnau sồr 5K jăt jơnau bơto sồr bơh Bộ Y tế dê”.

               Làng bol nền nòn tăp sèng kơ̆p lơh jăt ală broă dan cih măt ai mhàm dong kờl is

Jăt ồng Nguyễn Đức Phú, Kuang atbồ Anih lơh broă Mpồl đơng lam ai mhàm dong kờl is càr Dak Lak nàng di pal mờ broă kờñ ai mhàm drơng tàm broă sơm kòp tàm dơ̆ rơcang sơndră mờ kòp Covid-19, bơh bồ nam tus tŭ do, càr Dak Lak neh bơyai lơh uă dơ̆ ai mhàm dong kờl is, hòi jà gal làng bol tus bal.

Mìng is broă lơh pơrhê mờ broă lơh ală ntờc mhàm phồng-kàl rơlô bơkang nam do geh bơyai lơh gờñ rơlao 1 nhai pơn drờm mờ ală nam nàng dong kờl di tŭ geh khà mhàm jun tus Viện huyết học mờ truyền máu Dà lơgar in. “Ală dơ̆ ai mhàm dong kờl tàm dơ̆ do den bơdìh mờ broă sơm kòp tàm càr gam dong kờl ai Viện huyết học mờ truyền máu dà lơgar in là tiah đah tô dà lơgar. Tŭ do tài bơta kòp gơtờp hờ tiah đah tô hơ̆ ờ gơtùi dờp mhàm, den tàng Mpồl đơng lam neh ai nàng jun tus Viện huyết học mờ truyền máu dà lơgar in”.

Ngai chờ ai ntờc mhàm phồng Tây Nguyên nam do geh bơyai lơh tàm 6 anih tàm càr Dak lak, kờp dŭ geh 2 rơbô 900 kơl dung mhàm. Mìng is tàm ngai 08 nhai 6 lài do, broă lơh do neh dờp geh rơlao 1 rơbô kơl dung mhàm. Lài mờ hơ̆, tàm ngai 06 nhai 06, Ngai chờ ai mhàm dong kờl neh geh bơyai lơh tàm kơnhoàl Ea Kar mờ geh rơlao 1 rơbô 200 kơl dung mhàm mờ neh jun 500 kơl dung mhàm nàng dong kờl Viện huyết học mờ truyền máu dà lơgar in.

Cau cih H’ Xíu-Cau mblàng Ndong Brawl