VOV4.K’ho- Mho ngai 17/11, Ngai chờ tam klac dờng gùt jơi bơtiàn kung geh bơyai lơh tàm ƀòn Đăk Dơn, xã tiah ngài Măng Ri, kơnhoàl Tu Mrông, càr Kon Tum. Ƀòn Đăk Dơn tŭ do geh 100 hìu bơnhă làng bol, mờr 350 nă cau, jơh ală ndrờm là kòn cau Sơdàng lơm. Ală nam rềp ndo, phan bơna, rài kis làng bol dê geh tam gơl uă ngan kơnờm tàm ală bơta chi tam geh cồng nha lơh sa uă, bè kơnuh sơnơm Ngọc Linh, hồng đẳng sâm, kơphe tiah mrềt...

Dròng cing, jañ mồng, tamya xoang tàm Ngai chờ tam klac dờng gùt jơi bơtiàn tàm xã Đăk Dơn, kơnhoàl Tu Mrông, càr Kon Tum

Tàm Ngai chờ tam klac dờng gùt jơi bơtiàn, làng bol ƀòn Đăk Dơn bal mờ gơp dròng cing, jañ mồng, tamya xoang, yal tơnggit niam chài phan sa; hơ pơrgon lơh ngan 100% hìu bơnhă làng bol geh khà jờng hìu bơnhă niam chài; tơnguh broă lơh lơh bal tam kơnuh sơnơm Ngọc Linh mờ mpồl lơh sa kă bro; jơh nùs tus bal bơt bơtàu ƀòn lơgar pa, lơh jat is ală jơnau hơ pơrgon tàm ƀòn lơgar mờ lơh jat adat boh lam.

Tus chờ hờp bal mờ làng bol ƀòn Đăk Dơn, ồng Dương Văn Trang, Bí thư Tỉnh ủy, Chủ tịch Hội đồng Nhân dân càr Kon Tum jờng rơ broă lơh ngan bơh làng bol dê tàm bơtàu tơnguh lơh sa, mờ kung ai tơlik bè broă lơh nàng bơtàu tơnguh bơta pràn bơh ù tiah tam kơnuh sơnơm Ngọc Linh dê.

Cau mblàng K’Duẩn