VOV4.K’ho - Ngai do, Quốk hội pơn jăt tai cri bơyai pờ tơlik tàm internet bè rơndăp broă cih Nghị quyết bè broă nam priă jền, priă nàng dong kờl broă brồ guh mờ tơnguh bơtàu lơh sa mpồl bơtiàn mờ cri bơyai pờ tơlik tàm internet bè rơndăp broă cih Nghị quyết tơrlòng ờ uă kơ cế, broă lơh krơi is tơnguh bơtàu ƀòn dờng Cần Thơ.

Mho òr (06/01), Quốk hội cri bơyai tàm mpồl bè gùng dà bơcri priă lơh Rơndăp broă bơ̆t bơtàu broă lơh gùng tàm ù gờl ntoăt jờl đah tô-đah jum hờ đah măt tơngai lik tơngai bơh nam 2021-2025. Tơngu me geh ală kwang bàng sền gròi ngan là bè cồng nha bơh broă hòi jà, ngui priă mờ broă lơh jăt rơndăp broă. Rơndăp broă lơh gùng ntoăt jờl đah tô-đah jum hờ đah măt tơngai lik tơngai bơh nam 2021-2025 bơcri priă lơh 729 kơi sồ, tam pà lơh gơs 12 rơndăp broă lơh pơgồp bal. Bè kờp jơh khà priă bơcri tàm rơndăp broă lơh, jăt pang sră yal bơh Cíñ phủ, là di pơgăp 146 rơbô 990 tơmàn đong. Tàm bơta gơtìp uă kal ke mờ bơta pràn geh, ală kwang bàng Quốk hội sồr pal rơwah gơl gùng lơi kuơ màng jal mhar den lơh lài, kơlôi sơnơng tus mờ cồng nha, rơwah gùng dà bơcri priă... Pơgồp jơnau đơs bè rơndăp broă cih Nghị quyết tơrlòng lơh ờ uă kơ cế, broă lơh krơi is tơnguh bơtàu ƀòn dờng Cần Thơ, ală kwang bàng đơs là geh ai kơ cế hòi jà bơcri priă, tơnguh uă rài kis làng bol in, bơ̆t bơtàu ƀòn dờng Cần Thơ gơs tiah tờm tơnguh bơtàu tàm tiah ring dà dờng Cửu Long dê, pơgồp bal di pal tàm broă tơnguh bơtàu bal bơh dà lơgar tàm tơngai tus.

Cau mblàng Ndong Brawl