VOV4.K’ho- Ngai do (15/12), sơn đờm pơrjum hòi jà tăc phan mờ lơgar ndai lơgar Việt Nam nam 2021 mờ tơngu me: “Hòi jà tăc phan mờ lơgar ndai pơgồp bal tàm broă brồ guh mờ tơnguh bơtàu lơh sa”. Pơrjum cri bơyai geh 2 dơ̆ pơrjum cri bơyai tờm, mờ ală tơngu me: Bơta niam mờ bơta tơlòng bơh ờ uă drà kă bro phan mờ lơgar bơdìh tơngai tơnơ̆ mờ kòp Kovid-19; Gùng dà, broă lơh hòi jà tăc phan mờ lơgar bơdìh pơgồp bal tàm broă brồ guh mờ tơnguh bơtàu lơh sa.

Ƀộ trưởng Ƀộ Kông thương ồng Nguyễn Hồng Diên đơng lam pơrjum cri bơyai. Pơrjum cri bơyai hòi jà tăc phan mờ lơgar ndai lơgar Việt Nam là broă lơh pah nam geh Ƀộ Kông thương đơng lam, pơgồp bal mờ ală Ƀộ, gah lơh broă gơrềng bal bơyai lơh nàng ai geh dơ̆ cri bơyai bal đah anih lơh broă đơng lam broă hòi jà tăc phan mờ lơgar ndai mờ ală cau tờm tus bal broă tăc phan mờ lơgar ndai; anih lơh broă cri bơyai broă lơh, ai geh bơta ƀuơn ai broă hòi jà broă tăc phan mờ lơgar ndai lơgar Việt Nam dê, pơgồp bal tàm broă tơnguh uă bơta pràn tàm pơrlòng ai phan tăc mờ lơgar ndai mờ bơta pràn rơcang lài bơh mpồl lơh sa kă bro tàm broă tăc phan mờ lơgar ndai in.

Cau mblàng Ndong Brawl