VOV4.K’ho- Ngai do (20/7), mut pơrjum dơ̆ 1- Quốc hội khóa 15. Lài hơ̆, tàm hìu lơh broă Quốc hội neh geh lơh pơrjum đah Đảng đoàn Quốc hội mờ Mpồl kuang bàng duh broă Đảng Chính phủ. Đơs bè broă lơh rơcang lài tơngume pơrjum dơ̆ 1 in, Chủ tịch Quốc hội ồng Vương Đình Huệ đơs là, ală anih lơh broă bơh Quốc hội, Ủy ban Thường vụ Quốc hội mờ Chính phủ, ală Bộ, gah broă lơh, ală anih lơh broă sền gàr adat boh lam neh pơgồp bal jơh nùs, bơh sơn rờp neh lơh geh bơta ring bal uă mờ ală tơngume yal Quốc hội in.

Tàm tơngai kòp Covid-19 gơlik geh kal ke, Đảng đoàn Quốc hội neh lơh broă mờ ală anih lơh broă geh gơ rềng, yal mờ Bộ Chính trị mờ geh pơrjum tơrgùm bal tàm cơldŭ pơrjum Diên Hồng mờ nùs nhơm tềm pềr tŭ tơngai mờ lơh geh cồng nha uă ngan rlau jơh, ờdo ờdă ngan rlau jơh, broă lơh dơ̆ pơrjum dê geh tơrmù tŭ tơngai, kờp dŭ geh tơn jơh tàm ngai 31/7 do, lơh broă jơh bal tàm ngai rlô.

Bè rơndap broă sền gàr ờdo ờdă ai pơrjum in, Chủ tịch Quốc hội ồng Vương Đình Huệ đơs nền, Văn phòng Chính phủ, Bộ Y tế neh lơh broă gờñ ngan nàng rơcang lài ai pơrjum dơ̆ 1, Quốc hội khóa 15 in. Jat nùs nhơm gàr ờdo ờdă tàm jơh ală bơta, tus tŭ do, jơh ală kuang bàng Quốc hội mờ cau drơng broă bơh Văn phòng Quốc hội dê neh geh cit sơnơm vaccine mờ lơh xét nghiệm.

Cau mblàng K’Duẩn