VOV4.K’ho - Rơndăp, tam gơl pa, tơrgùm ală kông ty nông lâm nghiệp dà lơgar jăt Nghị quyết sồ 30 nam 2014 bơh Ƀộ Cíñ trị khoă 11 mờ Nghị định sồ 118 nam 2014 bơh Cíñ phủ là gùng dà broă lơh dờng bơh Đảng, Dà lơgar. Tàm Tây Nguyên, ală kông ty nông lâm nghiệp dà lơgar gam atbồ dùl bă ơnàng ù tiah, tus mờr 1 tơlăk 200 rơbô lồ. Do là bơta kuơ màng ai broă tơnguh bơtàu lơh sa tàm tiah geh bơta pràn bè Tây Nguyên. Mơya, ală kông ty nông lâm nghiệp tàm do den lơh broă ờ geh cồng nha, kal ke, gơtìp ờ niam.

Kông ty kổ phần Tập đoàn TH là dùl tàm ală mpồl lơh sa kă bro lam lài tus bal tàm broă rơndăp wơl, tam gơl pa ală kông ty lâm nghiệp tàm Tây Nguyên mờ broă bơcri priă tàm ù tiah ơnàng 27 rơbô lồ priă geh atbồ, ngui ờ geh cồng nha tài bơh bàr kông ty lâm nghiệp Rừng Xanh mờ Cư̆ Mlan, kơnhoàl Ea Súp, càr Dăk Lăk.

                  Kông ty kổ phần Tập đoàn TH gơtìp kal ke bè adăt boh lam bal mờ mùl màl

Lồi nam 2016, tàm tơngu me rơndăp wơl broă lơh bàr gah, Kông ty TNHH lơh phan sa mờ lâm nghiệp Dăk Lăk geh crơng gơs. Ồng Trịnh Xuân Thắng, Kwang atbồ kông ty git, gùng dà broă lơh là ai kông ty tam phan mờ ròng phan tàm bă ù brê sar mờ mùl màl uă bă ù neh ờ gam geh chi brê tai. Mơya, kơrnoăt bơh Dà lơgar geh broă tam gơl mờ broă ơm tam gơl ù brê sar nàng lơh broă ndai. Rơndăp broă lài ngan pal ơm ờ lơh. Tàm tŭ hơ̆, neh geh 6 nam mơya ală sră nggal tam gơl mpồl lơh sa kung gam ờ hềt lơh gơs, geh ờ uă sră nggal adăt boh lam bè sră dờp gơnoar ngui ù tŭ do kung gam cih măt bàr kông ty lài do. Bơta ờ sŭk rơlao, lài mờ tŭ tơrgùm bal, git nđờ rơbô lồ ù neh gơtìp roh mờ tŭ do Kwang àng càr Dăk Lăk gam lùp khào bè bơta tìs do. Broă bơcri priă bơh kông ty gam gơtìp kal ke bè adăt boh lam bal mờ bơta mùl màl: “Tơngu me bơh Tập đoàn tus tàm do là nàng geh ù nàng bơcri priă, mơya tus tŭ do mìng rơ̆p geh ù tàm pang sră, hơ̆ là bơta tờm ngan. Geh ală tiah gơtùi lơh den gơtìp làng bol ờ ai. Di lah geh ală tiah geh ù làng bol mờ hềt sơgràm den hơ̆ là bă ù ờ niam, ù ngài, ù klàr mờ ờ geh uă ngan. Tập đoàn ờ gơtùi tă priă bơcri lơh, tài di lah lơh mìng gơtìp roh, ờ gơtùi”.

Kung geh pin dờn ngan sơl tus bal lơh sa tàm gah lơh sa suơn sre tàm Tây Nguyên là Kông ty cổ phần phan sa bơkah NutiFood tŭ blơi wơl geh mờr 80% cổ phần tàm Kông ty kơphe Phước An. Broă lơh jŏ jòng bơh kông ty dê là ngui broă lơh sa suơn sre kông nghệ kao, ai ală phan geh bơta niam tus tàm drà kă bro tàm lơgar mờ dunia. Mơya 4 nam tơnơ̆ mờ lơh broă bal, ờ mìng ờ geh lơh tàm broă lơh sa, kă bro mờ gam gơtìp mờ broă tam phà adăt boh lam mờ ală làng bol geh dờp ù. Mò Nguyễn Huyền Trâm, Kwang atbồ kông ty pà git, bŭ lah neh lơh ngan cri bơyai, broă kung gam ờ gơtùi bơsong sơl, kông ty pal ai anih cah rơña tus bơsong di jăt mờ adăt boh lam dê: “Nàng bơsong broă tam phà, Kông ty neh lơh jăt uă broă lơh nàng lơh jăt tàm nùs nhơm lơh broă bal, ring bal bơsong bơh làng bol mờ cau dờp ù mờ kông ty dê, lơh jăt di mờ kơrnoăt tàm adăt boh lam. Cồng nha kung gam ờ hềt geh sơl. Broă lơh dŭt ndơl, bol añ pal pơyoa sră ală hìu dờp ù do tus mờ anih cah rơña nàng bơsong di jăt mờ kơrnoăt tàm adăt boh lam dê”.

                          Mùl màl roh ù, roh brê uă ngan kung gam ờ hềt geh bơsong gơs sơl

Hoàc huơr bơh broă ờ loh làng tàm broă lơh bal kung gam lơh Kông ty Cổ phần kơphe Gia Lai mờ Kông ty Kổ phần Ce Biển Hồ mờ mờr 1 rơbô 700 lồ tàm càr Gia Lai gơtìp kal ke ngan lơh ală broă lơh sa, kă bro tơnơ̆ mờ 3 nam lơh bal. Nam 2016, tŭ lơh jăt broă lơh bal, càr Gia Lai mìng geh ai tơn jŏ broă jào suơn tam phan tus tàm tŭ kông ty mùl màl tam gơl gơs kông ty cổ phần. Mơya, bàr kông ty lài do là kông tu TNHH MTV kơphe Gia Lai mờ Kông ty TNHH MTV Ce Biển Hồ den lơh ờ di mờ jơnau đơng lam bơh UɃÑZ càr, pơn jăt tai kĭ sră nggal lơh broă bal tơnjŏ tơngai mờ cau lơh broă tus nam 2042 mờ nam 2047.

Ồng Trịnh Đình Trường, Củ tịc HĐQT, Kwang atbồ bơh bàr Kông ty kổ phần pà git, cau bơcri priă neh ờ git mờ ală broă lơh bal bè hơ̆, cau lơh broă tŭ do gam lơh tờm mùl màl suơn tam phan. Kông ty cổ phần gam geh sền bè kông ty dà lơgar, gam geh bơta rồn bơklơn gùng dà broă lơh sa, kă bro, ờ hềt geh kơ cế, broă lơh nàng mpồl lơh sa kă bro gơtùi lik klàs mờ broă lơh lài do. Tàm tŭ hơ̆, bơta phan mờ cau bơcri priă geh blơi mờ mìng là cổ phần, phan bơna tàm bă ù, gơnoar geh ơpah ù mờ gam là kơnòl mờ cau lơh broă, kơnòl bơh mpồl lơh sa kă bro dà lơgar lời wơl. Ală bơta do neh ờ geh sền wơl di pal lài mờ tơnơ̆ mờ cổ phần jơh: “Pơrlòng tàm drà kă bro den bè bơta geh ngan là pal pơrlòng niam, ù tiah niam, jơh ală bơta niam mơya Dà lơgar ờ git lài jơh hoàc huơr bơh bơta do. Bol añ gơs “cau gơtìp”. Tŭ do gơlơh bè neh gơtìp mù tàm ù mbè bloh, jê tàm bơta do là gơtìp pă, cơn đoà den ờ gơtùi tai, nggui den ờ gơtùi tai, bơta lơi kung gơtìp chơ̆t”.

Mpồl lơh sa kă bro tă git nđờ jơ̆t tus git nđờ rơhiang tơmàn đong nàng tus bal cổ phần jơh, ai tơngu me bal mờ Dà lơgar lơh geh cồng nha ală bă ù dờng ơnàng mờ niam tàm Tây Nguyên. Mơya, tơnơ̆ mờ rơndăp, cổ phần, uă mpồl lơh sa kă bro den gơtìp tàm ală bơta kal ke, ală tam phà ờ hềt geh tơn jơh mờ hoàc huơr là broă lơh sa, kă bro gơtìp ờ geh cồng nha jŏ jòng sùm.

Cau mblàng Ndong Brawl