VOV4.K’ho- Pa do neh geh lơh Pơrjum pờ tơlik tơn tàm internet Duh broă sùm Chính phủ bal mờ 27 càr mờ ƀòn dờng tiah đah jum dà lơgar bơh càr Phú Yên tus càr Cà Mau bè broă lơh rơcăng sơndră kòp Covid-19. Đơs tàm dơ̆ pơrjum, ồng Phạm Minh Chính- Thủ tướng Chính phủ sồr pal ngui niam bơta pràn tam klăc dờng jơh gùt jơi bơtiàn, jơh ală anih lơh broă chính trị, mpồl bơtiàn, làng bol, mpồl lơh sa kă bro bal mờ ƀòn lơgar geh kơnòl bal, tam pà bal mờ gơ̆p lơh jăt broă lơh tam dră mờ kòp.

Tàm pơrjum, ală kuang bàng neh tơrgùm cribơyai sền swì dipal mờ bơta gơbàn bơh kòp Covid-19 dê tŭ do mờ yal lài broă gơlik geh tàm tơngai mờr tus; cồng nha, bơta ờ hềt pràn jak tàm ală tŭ lơh jăt ală kơnòl broă, ngan là bè broă lơh đơng lam sồr lơh, lam lơh jăt, bơta pơgồp bal đah ală gah, ală tiah nàng broă lơh rơcăng sơndră kòp geh cồng nha rlau, jăt tàm nùs nhơm sền gàr pràn kơldang să jan làng bol in là hơđang rlau jơh, lài ngan rlau jơh; ai lài khà dùl tàm ală tiah tŭ do là broă lơh rơcăng sơndră kòp Covid-19, ală tiah ờdo ờdă, den kung gam gàr sùm broă lơh sa, bơtàu tơnguh lơh sa. Jơnau yal tàm pơrjum, ồng Nguyễn Thanh Long- Bộ trưởng Bộ Y tế pà gĭt, bơta kòp bơtờp tàm lơgar kung gam pơn jăt tai gơbàn kal ke ngan. Bộ trưởng Bộ Y tế ồng Nguyễn Thanh Long, đơs: Gơbàn uă ngan tŭ do là jơi tam gơl să Delta tàm gùt lơgar, jơi tam gơl să do lơh gơlik ai he in bơta rềs àr gơ aniai tus jơh gùt plai ù. Ñchi gơlơh bol he gŏ là, dơ̆ do gơ lơh bơtờp jăt mpồl, jăt tơl nă cau, uă ngan cau kòp tàm dùl tơngai bè hơ̆ taih. Tài bơh gơ pơrdô bơta gơdrơm kòp bơh ală cau cèng kòp tàm să mhar rlau mờ tơngai hòi tơngai gơbàn wơl bơh gơ dê mhar rlau mờ lài. Bol añ kung yal tơngkah lài sơl gơwèt mờ ală tiah tam dră mờ kòp ờ gŏ di bè ală dơ̆ lài, pal tam dră bal mờ broă lơh sơrbac mhar rlau, pràn rlau, kơ̆ nùs rlau mờ kràñ cê jơh nùs rlau.

Pơrjum pờ tơlik tơn tàm internet bơh Duh broă sùm Chính phủ dê mờ 27 càr, ƀòn dờng tiah đah jum dà lơgar

Tềng đăp bơta gơbàn kal ke bơta kòp bơtờp dê, ƀòn dờng Hồ Chí Minh neh rơcăng lài sơndră wơl, jăt ồng Nguyễn Thành Phong- Chủ tịch Ủy ban Nhân dân ƀòn dờng Hồ Chí Minh dê đơs, ƀòn dờng tŭ lơi kung rơcăng lài ai broă tam dră wơl tŭ geh 20 rbô nă cau bơtờp kòp. Ồng Nguyễn Thành Phong, đơs: Tềng đăp bơta kơn jơ̆ bơh bơta gơguh uă tai bè khà cau bơtờp kòp lài mờ tơngai lơh jăt Chỉ thị sồ 16, ƀòn dờng neh tơrgùm lơh niam wơl mờ ai ngui 5 ròt hìu ơm bal gam lời gời bơh tiah ntrờn ơm kis pa tàm sơnah ƀòn An Khánh, ƀòn dờng Thủ Đức bal mờ 24 rbô nơm jơnờng mờ anih tờm lơh pràn wơl să jan bal mờ bơta rơndăp tăp sèng phan bơna niam ngan pa ngan mờ geh tơl pràn dong kờl tă nhơl dùl tŭ bal tus 1 rbô nă cau kòp in, tus tŭ do den ƀòn dờng gơtùi đơs nền là neh rơcăng lài jơh ai broă sơndră wơl in tŭ geh 20 rbô nă cau bơtờp kòp.

Tơnơ̆ mờ tŭ iăt ală jơnau đơs cribơyai bơh ală tiah dê mờ ală bộ, gah lơh broă dà lơgar dê, pơndŭt dơ̆ pơrjum, ồng Phạm Minh Chính- Thủ tướng Chính phủ jờng rơ ală cồng nha mờ ƀòn dờng Hồ Chí Minh mờ ală càr dê neh lơh geh tàm tơngai do, neh lơh ngan jơh nùs jơh pràn he dê, tài bơta pràn kơldang să jan, màng kis bơh làng bol dê. Thủ tướng sồr pal geh broă lơh pràn kơldang, kràñ cê jơh nùs, lơh niam, dipal mờ bơta geh ngan, ngac ngar, cồng nha rlau nàng tơrmù mờ kơryan kòp bơtờp, sền broă sền gàr, dong kờl pràn kơldang să jan làng bol dê là hơđang rlau jơh, ờ gŏ di lời khăt dùl nă làng bol lơi gơtìp jơgloh, ờ geh àu soh, phan ngui sa pal geh tàm tŭ do; tơrgùm dong kờl sơm kòp ai cau gơtìp bơtờp kòp in, tơrmù uă ngan rlau jơh khà cau chơ̆t; gàr kơ̆ lơngăp lơngai chính trị, rơndăp tăp sèng ờdo ờdă jơh gùt mpồl bơtiàn ai làng bol in tàm khăt bơta lơi digơlan gơlik geh; gàr kơ̆ kơl jăp tiah nhàr lơgar, bañ lời lik mờ mŭt tàm lơgar tìs mờ kơrnoat boh lam; sền gàr kơ̆ kơl jăp ală anih lơh sa, tiah sền gàr ală anih lơh gơlik phan kă bro. Bè nùs nhơm đơng lam, Thủ tướng đơs sùm, pal ngui niam bơta pràn tam klăc dờng jơh gùt jơi bơtiàn dê tàm broă lơh rơcăng sơndră kòp. Thủ tướng ồng Phạm Minh Chính đơs sùm: Ờ gŏ di tam gơl nùs nhơm “tam dră mờ kòp bè tam dră mờ bol sò tơm sơl”, jơh nùs geh cồng nha rlau jơh tam gơl bơh broă lơh rơcăng lài tus tam dră. Ai rơcăng sơndră kòp là tờm, kuơmàng, jŏ jòng mờ lơh nền. Hòi tơrgùm bơta pràn tam klăc dờng jơh gùt jơi bơtiàn, jơh ală anih lơh broă chính trị, ƀòn lơgar làng bol, mpồl lơh sa kă bro, mpồl bơtiàn geh kơnòl bal, bal mờ gơ̆p lơh jăt broă tam dră mờ kòp, lơh jăt ală bơta pal jăt, broă pơlam lơh neh geh ală kấp geh gơnăp gơnoar ai ngui mờ bơto pơlam. Ngui niam jơh nùs nhơm pơđơl pràn is, lơh ngan is, bơceh pa, rơcăng lài bơh ală kấp, ală gah, ală tiah dê. Broă gơlik geh pa pal geh gùng dà broă lơh pa, pal jăt sền nền nòn broă gơlik geh, jăt tàm bơta ngan ngồn nàng ai tơlik ală gùng dà broă lơh dipal, ngui niam ngan bơta bơceh pa, rơcăng lài. Tơl xã, sơnah ƀòn, hìu măy, anih lơh broă, mpồl lơh broă pal là phòng kơnong tam dră mờ kòp, tơl nă làng bol là dùl nă cau ling lam lài tàm tiah lam lài tam dră mờ kòp.

Ồng Phạm Minh Chính- Thủ tướng Chính phủ

Bal mờ hơ̆, pal sền dờng màng bơta kuơ dipal mờ kơrnoat boh lam bơh làng bol dê, tơnguh uă cồng nha drơng broă làng bol in. Tus bal tam dră mờ kòp là kơnòl, gơnoar broă mờ gơnoar kuơ bơh làng bol dê. Kấp ủy, mpồl đảng, gơnoar ătbồ, ală anih lơh broă chính trị ală kấp pal tơngŏ loh làng là anih pin dờn bơh làng bol dê; ai bơta kal ke, bơta lòng tam gơl gơ gơs là bơta pràn bơta gơn kơnờm dờng kràñ, drơng làng bol in niam rlau. Hòi jà làng bol tus bal dong kờl, lơh gơlik bơta gơ dan ai làng bol in lơh jăt niam ală jơnau sồr bơh Dà lơgar dê bè rơcăng sơndră mờ kòp mờ lơh sa kă bro. Đòm jăt mờ ngui niam ală gùng dà broă lơh, cồng nha lơh geh, jơnau bơsram niam, broă niam cau pơnrơ jk tàm broă lơh tam dră mờ kòp.

Ală tiah geh uă anih bơtờp kòp tơrgùm cang tiah, gờñ bè ờs wơl rài kis. Ngui niam jơh ală tŭ tơngai niam nàng dong tơnguh lơh sa, kă bro; crơng gơs ală anih tờm dong kờl, gùng che điện thoại is, phan ngui dipal; kơlôi sơnơng lơh pang internet ngui công nghệ thông tin nàng làng bol in yal jơh ală bơta kal ke, kòl yan tàm khăt tŭ lơi, nàng làng bol in iang nùs tă pơgồp, tam pà bal tàm broă lơh rơcăng sơndră kòp. Tàm tơngai lơh jăt Ală Chỉ thị sồ 15, sồ 16, den pal lơh niam broă lơh bồ tơngoh nùs nhơm ai làng bol in, sền gròi dong kờl rài kis nùs nhơm ai làng bol in, tơrmù bơta ờ suk bơh làng bol dê. Ală anih lơh broă sră băo di tŭ, sơrbac mhar yal tơngĭt jơnau nàng làng bol in jơh nùs tus bal broă lơh rơcăng sơndră kòp.

Thủ tướng sồr ală kấp, ală gah, ală tiah lơh ngan rlau tai, jơh nùs jơh tồr rlau tai, lơh broă lơi sir jơh broă hơ̆, gờñ mhar tơn jơh kòp bơtờp, cèng wơl rài kis ring lơngai ai làng bol in, lơh jăt jai pha jơnau kờñ dơ̆ lĕ bal.

            Jăt VOV1- Cau mblàng Lơ Mu K’Yến