VOV4.K’ho- Nhai 9 tus digơlan lam lơh cĭt sơnơm vaccine Nano Covac bơh  Học viện Quân y dê lơh gơlik. Jơnau yal do geh ai tơlik tàm Pơrjum pờ tơlik tơn tàm internet lam lơh kơnòl broă, gùng dà broă lơh jal mhar rcang sơndră kòp Covid-19 tàm mpồl ling klàng tus 187 anih tàm tơrƀŏ bal bơh Bộ Quốc phòng dê bơyai lơh drim ngai 1/6.

Tàm dơ̆ pơrjum, Trung tướng, GS.TS ồng Đỗ Quyết, Kuang atbồ Học viện Quân y pà gĭt, tŭ tơngai kơlôi sơnơng cĭt tơrlòng lài sơnơm vaccine Nono Covac bơh Học viện Quân y dê pơgồp bal mờ mpồl dong kờl Nanogen geh lam lơh ờdo ờdă, geh cồng nha niam. Tàm nhai 6 do geh lơh cĭt tơrlòng lài tơngai dơ̆ 3 mờ khà mẫu uă, cĭt tơrlòng lài rlau 13 rơbô nă cau mờ cĭt àm uă càr, ƀòn dờng tàm gùt lơgar. Jat GS.TS ồng Đỗ Quyết đơs, tơnơ̆ tŭ geh Hội đồng Nùs nhơm dà lơgar ring bal mờ Bộ Y tế ai gơnoar lam lơh den tàm nhai 9 tus gơtùi cĭt sơnơm vaccine do.  

 Cau mblàng K’Hạnh