VOV4.K’ho- Uă mpồl lơh sa kă bro nhơl chờ tàm Dà Làc, càr Lâm Đồng gam gơtìp kal ke tài ờ hềt geh tơl bơta nàng pờ mpồng wă nac. Jơnau là tài bơh uă ngan cau lơh broă tàm gah do ndrờm ờ hềt cit tơl 2 ding sơnơm vaccine jat jơnau sồr.

Bơh ngai Chính phủ ai tơlik Nghị quyết sồ 128 bè “jơnau cih ing gơ dờp ờdo ờdă, ngac ngar, gròi sền geh cồng nha kòp Covid-19”, càr Lâm Đồng chồl pràn broă bơtàu tơnguh wơl lơh sa, kă bro tàm bơta bè ờs pa, ồng Lê Hồng Thanh, Kuang gròi sền dờng dùl hìu nac drơng gah nhơl chờ tàm tiah tờm ƀòn Dà Làc chờ hờp ngan. Tài bơh tơnơ̆ nggùl nam hìu nac til mpồng tài bơh kòp Covid-19, tŭ do neh geh tŭ niam nàng lơh broă wơl. Mơya tŭ do hìu nac ồng dê kung gam ờ hềt gơtùi lơh broă tài bơh ală cau lơh broă ờ hềt cit tơl 2 ding sơnơm vaccine jat jơnau sồr. Ồng Thanh moat jrùm đơs: “Bơh nhai 6 nam 2021 tus tŭ do, hìu nac ơm ing ờ lơh broă, bulah neh ai pờ mpồng wơl mơya ờ geh wă nac tài bơh jơnau sồr mờ Bộ Y tế ai tơlik là pal cit 2 ding sơnơm vaccine gơ wèt tus mờ cau drơng broă gah nhơl chờ, tàm tŭ hìu nac bol hi mìng rơp pa geh cit 1 ding sơnơm vaccine. Jat jơnau sồr, dilah cit 2 ding sơnơm vaccine den pal roh 6 poh, hơ̆ là tus lồi nhai 11 hơ̆ sồng bol hi geh cit. Mờ dilah ngui tai jơnau sồr 14 ngai tai, hơ̆ là tus nggùl nhai 12, ndrờm mờ broă jơh nam den hơ̆ sồng wă nac. Hơ̆ là hoàc huơr dờng ngan ai gah nhơl chờ Dà Làc”.

Tiah tờm ƀòn dờng Dà Làc, tiah geh bơta pràn bè bơtàu tơnguh nhơl chờ tàm bơta bè ờs pa

Jat ồng Nguyễn Viết Vân, Kuang atbồ Sở Văn hóa, Thể thao mờ Du lịch càr Lâm Đồng đơs, gùt gah nhơl chờ geh git nđờ jơt rbô nă cau lơh broă, mìng is ală hìu nac, ală anih ơm wơl drơng nac nhơl chờ in geh tus 18 rbô 500 nă cau lơh broă geh jơnau kờñ cit sơnơm vaccine. Bulah càr Lâm Đồng neh lơh ngan tam pà lài sơnơm vaccine ai gah nhơl chờ in, dùl tàm ală gah lơh sa tờm ngan bơh càr dê, mơya tus tŭ do kung mìng pa rơp cit ding dơ̆ 1. Bè hơ̆ den tàng tŭ do kung gam ờ hềt tơl bơta nàng lơh broă, drơng nac nhơl chờ. Broă do bol hi neh dan Ủy ban Nhân dân càr Lâm Đồng nàng jòi gùng bơsong: “Bol hi neh lòt sền jơh ală hìu nac, anih ơm wơl drơng gah nhơl chờ, anih nhơl chờ mờ jơh nùs tam pà mờ ală mpồl lơh broă nhơl chờ tàm tơngai lài. Kuơmàng là tàm Dà Làc, tŭ mờ priă lơh geh gah drơng ala nhơl chờ geh tus 79% mơya neh til mpồng mờr dùl nam do. Gơ wèt mờ cit sơnơm vaccine, tŭ do gơ wèt mờ mpồl cau lơh nhơl chờ bơh Dà Làc tus Cát Tiên ndrờm neh geh cit sơnơm vaccine, mơya mìng pa rơp cit 1 ding. Añ neh dan mờ Mpồl đơng lam kung bè Ủy ban Nhân dân càr geh ai lài sơnơm vaccine gờñ ngan rlau jơh gah nhơl chờ in nàng geh tơl bơta lơh broă wơl, tă bơsong ală kòl yan, kal ke ai jơh ală mpồl lơh broă gah nhơl chờ in tàm tơngai tus”.

Mơya jơh ală hìu nac tàm Dà Làc ndrờm ờ hềt geh tơl bơta nàng pờ mpồng wă nac bơdìh càr

Bal mờ lơh ngan bơsong broă cit 2 ding sơnơm vaccine, gàr tơl bơta nàng drơng nac nhơl chờ in, gah nhơl chờ càr Lâm Đồng kung gam lơh ngan mhar lơh sir ală tơl khà ờdo ờdă tàm broă rơcang sơndră kòp gơ wèt tus mờ broă lơh nhơl chờ bơh càr dê. Geh bè hơ̆ den hơ̆ sồng Dà Làc, Lâm Đồng gơtùi gơs là anih tus ờdo ờdă bơh nac nhơl chờ dê tàm bơta bè ờs pa.

Cau mblàng K’Duẩn