VOV4.K’ho - Broă lơh bơtơ̆t dơng dà Krông Păc thượng, càr Dăk Lăk là rơndăp broă lơh dờng, priă bơcri rơlao 4 rơbô 400 tơmàn đong, mơya gơtìp uă ngan kal ke den tàng neh rơlao 12 nam lơh, kung gam uă kal ke sơl. Kal ke uă ngan là tàm tŭ do là broă ntrờn làng bol, ơm kis kơ̆ dùl bă tiah. Cau kờñ lòt den ờ hềt geh ù nàng lòt, cau neh lòt den ờ hềt iang nùs bè rài kis pa. Tàm tŭ hơ̆, tơngai tờm tàm kàl mìu mờ uă bơta ngòt rơngơ̆t di gơlan gơtìp, gam mờr tus.

Ồng Vàng Seo Pao là dùl tàm ală hìu sơnơm rờp ngan tàm tiah tơnao dơng dà Krông Păc thượng, xã Cư̆ San, kơnhoàl Mdrăk ntrờn tus tàm ƀòn ơm kis pa sồ 1, xã Cư̆ Elang, kơnhoàl Ea Kar, càr Dăk Lăk.

                Broă ntờn om kis bơh tơnao lơh bơtơ̆t rơbòng dà Krông Păc thượng gam uă kal ke

Ồng Pao geh pồ lơh Phó kuang atbồ ƀòn ing tàm tơngai kơ̆p geh crơng gơs ƀòn pa mùl màl. Ồng pà git, tơngai sơnrờp, khà hìu tus tàm ƀòn ơm kis pa uă, mơya tŭ do cau tus ờ gal ngan, pah poh mìng geh bơh 1 tus 2 hìu. Geh bơta do mìng là gơrềng tus mờ broă ai ù lơh sa. Geh ờ uă hìu neh ai ù lơh sa mơya ờ hềt tơl jăt mờ gùng dà broă lơh bơh càr neh kĭ. Tàm tŭ hơ̆, geh ờ uă hìu neh geh ai ù den cau tàm tiah do phà lơh gơtìp ờ khin tus lơh broă. Ồng Vàng Seo Pao ờ sŭk là, bơta do geh lơh kal ke tus mờ broă ntrờn ơm kis tàm tơngai tus. “Geh ờ uă cau tus tàm do, hìu neh ntrờn mơta suơn sre ờ geh nàng lơh, ù lơh sa kung ờ hềt gŏ sơl. Tŭ do gam ờ hềt tơm ntrờn ù tiah sơl, ờ hềt cò ù sơl. Uă cau tŭ do añ pal hòi jà mpồl lơh rơndăp broă càr mhar cò ù nàng kàl tus geh ù lơh sa, di lah bè do den bol añ ờ gĭt lơh broă bè lơi. Mpồl atbồ rơndăp broă càr lơh broă bè lơi, broă dềt ờ hềt geh lơh den gam 500 hìu làng bol tai bơsong bè lơi”.

Ồng Trần Văn Thanh, Chủ tịch UBND xã Cư̆ Elang, kơnhoàl Ea Kar pà git, kờp tus ngai 19 nhai 8, xã neh dờp 130 hìu làng bol, geh di pơgăp 600 nă cau tàm xã Cư̆ San, kơnhoàl Mdrăk ntrờn tus tàm ƀòn ơm kis sồ 1. Tŭ do, geh gŏ ờ uă cau kis tàm do mŭt tam phà ù mờ ală hìu ntrờn ơm kis. Bŭ lah xã neh bal mờ ală anih lơh broă, mpồl lơh broă tàm kơnhoàl tus bơsong, mờ đơs là cau tus tam phà là tìs jăt mờ ală kơrnoăt tàm adăt boh lam dê.

    Pal bơsong mhar ală kal ke tàm ală tiah lơh ƀòn ơm kis nàng ai geh jơnau ring bal bơh làng bol

Ală cau tam phà gam ờ hềt bơsong jơh neh geh jào anih lơh broă kuang àng bơsong, lơh ngan bañ lời gơtìp aniai tus mờ broă ntrờn ơm kis làng bol dê: “Neh geh uă ngan dơ̆ lam sồr, mblàng, jà rê tus UBND xã lơh broă, ờ geh tơngu me adăt boh lam nàng ală cau do đơs là ù bơh ală cau do dê, mơya ală cau do gam lơh ngan sơl. Sră nggal den bol añ gam lơh gơs mờ tơl tơngu me adăt boh lam nàng jào kuang àng kơnhoàl in bơsong di jăt mờ kơrnoăt tàm adăt boh lam. Ală cau do tus tam phà den lơh ờ niam tus mờ nùs nhơm làng bol tus ơm kis. Bol añ neh di tŭ rơpoa nùs làng bol, lam sồr làng bol  là ù geh jào den làng bol lơh, gam bol añ geh sền gàr mờ hơ là, gàr niam ờ do ờ dă mờ bal mờ làng bol bơsong ală kal ke do”.

Bơdìh mờ ƀòn ơm kis sồ 1, càr Dăk Lăk gam ai lơh ƀòn ơm kis sồ 2 ai làng bol kis bơh tàm tiah tơnao dà Krông Păc thượng, tàm xã Cư̆ Bông, kơnhoàl Ea Kar in. Mơya, jăt Phòng NN mờ PTNT kơnhoàl Ea Kar yal, tiah ƀòn ơm kis sồ 2 kung gam ờ hềt gơtùi dờp làng bol, tài gam kơ̆p tơm ntrờn ù tiah mờ bơcri priă bơ̆t bơtàu broă lơh.

               Broă ntrờn làng bol tŭ do geh càr Dăk Lăk sồr pal lơh jăt mhar nàng pleh mờ ală rềs àr

Bè bơta tờm lơh gơtìp lơyài ƀòn ơm kis, ala măt cau tờm bơcri priă, ồng Phạm Văn Hạ, Kuang atbồ Mpồl atbồ rơndăp broă bơ̆t bơtàu broă lơh sa suơn sre mờ gùng lòt càr Dăk Lăk pà git, tiah ƀòn ơm kis sồ 1 mờ sồ 2 lài do geh jào UBND kơnhoàl Ea Kar (cau tờm bơcri priă lài do) lơh. Broă lơh jăt lài do geh ală bơta kal ke, gơtìp tìs tus mờ mpồl dờp den tàng kal ke ngan nàng lơh jăt. Tàm ƀòn ơm kis sồ 1, sră rùp ù tiah tàm ƀlàng sre 22 lồ mờ bơnah rề ơnàng 110 lồ neh geh UBND kơnhoàl Ea Kar was, mơya tus tŭ do jơh ală file rùp ù tiah tờm ngan neh gơtìp roh. Lơh gơtìp ờ tơl tơngu me nàng lơh niam wơl rùp ù tiah mờ jòi sền wơl, lơh aniai uă ngan tus mờ broă tơm ntrờn ù tiah. Nàng geh tơngu me lơh jăt, pal lơh wơl broă was ù. Gơwèt mờ ƀòn ơm kis sồ 2 tŭ do gam bơcri priă lơh, lơh gơs gùng lòt tàm tiah lơh ƀòn ơm kis. Gam ù lơh sa, mìng rơ̆p tàm tơngai yal mờ ală cấp geh gơnoar in kĭ nàng tam gơl tơngu me ngui ù brê.

Ồng Phạm Văn Hạ pà git, Tỉnh ủy, UBND càr gam đơng lam nền nòn ngan, ală gah, mpồl lơh broă, ală cấp gam lơh ngan tus bal mờ broă lơh ngan tus lồi nam do geh lơh gơs broă tơm ntrờn ù tiah tàm tiah tơnao dà mờ ƀòn ơm kis ai rơlao 700 hìu làng bol, geh di pơgăp 4 rơbô nă làng bol. Bè bơta ờ sŭk ngòt gơbam dà tàm kàl mìu, dà tih, ồng Hạ pà git: “Lồi nam den di gơlan gơtìp gơbam dà mờ bol añ geh broă nàng tơmù bơta do. Tŭ do, bơta kuơ màng ngan là ntrờn làng bol, ală hìu tàm tiah thòng, bè broă lơh bơtơ̆t ñhoa 486 thơ̆k mù tus hờ đơm tŭ gơbam dà là làng bol ờ gơtìp aniai. Làng bol kis tàm tiah hơ̆ neh geh ntrờn jơh. Bol añ ai tơngai bañ jŏ ir, gàr niam ai làng bol in neh kơ̆p 10 nam do bloh, làng bol rê sơlơ gờñ tàm ƀòn ơm kis pa den sơlơ ờ hoan kal ke, rài kis sơlơ mhar ring niam”.

Tơnơ̆ mờ 12 nam kơ̆p gơn, rơndăp broă lơh bơtơ̆t rơbòng dà rơbô tơmàn đong Krông Păc thượng neh geh bơsong, làng bol neh sơn đờm nùs nhơm ring bal mờ ntrờn tus tàm ƀòn ơm kis pa. Mơya, broă lơh tàm ƀòn ơm kis pa tŭ do gơtìp ờ uă kal ke bè ù lơh hìu mờ ù lơh sa. Nàng làng bol iang nùs tus tàm ƀòn ơm kis pa mờ ring niam rài kis, ală cấp gơnoar atbồ càr Dăk Lăk pal gờñ tơmù ală kal ke tŭ do. broă tus bal pràn pal geh lơh mùl màl jơh mờ broă lơh ngan mờ jơh bơh cấp càr tus cấp kơnhoàl, xã, geh bè hơ̆, hơ̆ sồng di pal, ai geh nùs nhơm ring bal bơh làng bol dê.

Cau cih Công Bắc-Cau mblàng Ndong Brawl