VOV4.K’ho- Tàm ală ngai dà lơgar tơnkah 76 nam kăc màng nhai 8 mờ sơn tờm dà lơgar ngai 2 nhai 9, bơta kòp Covid-19 gam kal ke ngan. Chờ hờp tàm ngai kuơ màng bơh dà lơgar dê, mơya làng bol Tây Nguyên kung tơlik uă nùs nhơm rơcang sơndră mờ kòp gơtờp. Đơs bè bơta do, ồng Y Trớp, kòn cau Mnông, kis tàm ƀòn Jâng Plây, xã Trường Xuân, kơnhoàl Dăk Song, càr Dăk Nông đơs: “Satềp krơi is khăt gơboh dà lơgar, ngai chờ dờng bơh Dà lơgar dê. Làng bol chờ hờp ngan tŭ dà lơgar ngai sơlơ tơnguh bơtàu, rài kis làng bol ngai sơlơ gơguh uă. Mơya, tài kòp Covid-19 gơtờp lơh broă lơh sa mpồl bơtiàn gơtìp aniai. Tàm hơ̆ uă ngan là rài kis làng bol tàm ală càr tiah gơtìp kòp. Nàng sền gàr să tờm, hìu nhă mờ mpồl bơtiàn, làng bol tàm ƀòn kung lơh jăt nền nòn jơnau sồr 5K bơh Bộ Y tế, tơnguh uă nùs nhơm geh kơnòl. Tŭ geh cau krơi, cau rê bơh tiah gơtìp kòp den yal mơ tus mờ anih lơh broă geh gơnoar. Tơnguh nùs nhơm kờñ gơboh mờ dà lơgar, làng bol lam sồr bal tă biăp, kơnuh, plai chi nàng pơyoa pà tus mờ ală càr Bình Dương, Đồng Nai, ƀòn dờng Hồ Chí Minh mờ kơ̆p kờñ tam pà bal kal ke mờ kòp gơtờp nàng gờñ jơh, ală cau rê wơl mờ rài kis bè ờs”.

Nàng rcang sơndră kòp Covid-19, càr Kon Tum neh crơng gơs rlau 2 rơbô 800 Mpồl lơh broă mpồl bơtiàn. Tàm xã  kal ke uă Đăk Pxi, kơnhoàl Đăk Hà, mò Y Dim, Phó Bí thư Thường trực Đảng ủy xã pà gĭt: Tơngai pa do, Đảng bộ mờ gơnoar atbồ xã neh geh dơ̆ pơrjum mờ yal jơh gùt làng bol in wă bè khà ngòt rơngơ̆t, kal ke bơh kòp Covid-19 dê. Jat hơ̆, bơto pơlam làng bol in gĭt nàng lơh jat ală broă lơh rcang sơnrdă kòp geh cồng nha. Kuang bàng pơrjum làng bol, thôn tam pà mpồl sùm lơh broă sùm yal tơngĭt ai làng bol in bè broă lơh rcang sơndră kòp. Bol añ sùm tơngkah làng bol dilah geh broă kuơ kờñ lik lòt bơdìh den pal sùm pơn chèo glòm muh mat, rào tê mờ sơbong lơh kloh khuẩn ngan là tơnơ̆ tŭ ơm rềp mờ cau ndai nàng pleh mờ bơta bơtờp kòp. Bol añ sùm mblàng yal ai làng bol in bañ tơrgùm uă cau, kơryan ờ ai bơyai lơh dơ̆ chờ ñô sa dờng....

Xã Dà Sar, kơnhoàl Lạc Dương, càr Lâm Đồng gam là tiah niam ờ do ờ dă, ờ hềt dờp geh ală cau lơi gơtìp kòp Covid-19, mơya nùs nhơm rơcang sơndră mờ kòp sùm geh tơnguh uă. Ồng Liêng Jrang Ha Rô Ky, Chủ tịch UBND xã Dà Sar pà gĭt, bŭ lah rài kis gam kal ke, mơya làng bol neh tă pơgồp ală bơta phan geh kuơ, tàm hơ̆ uă ngan là phan geh lơh bơh broă lơh sa suơn sre bè biăp, kơnuh, plai chi geh să tờm lơh gơs nàng pơyoa tus dong kờl tiah gơtìp tam cah ngài mpồl bơtiàn. “Lơh jăt broă đơng lam bơh càr Lâm Đồng kung bè kơnhoàl Lạc Dương bè broă rơcang sơndră mờ kòp gơtờp, ală kuang bàng, làng bol ală kòn cau kis tàm xã Dà Sar bol añ dùl nùs lơh jăt nền nòn ală broă rơcang sơndră mờ kòp gơtờp kung bè tam cah ngài mpồl bơtiàn. Tàm 2, 3 poh pa do, bol añ neh crơng gơs anih gròi sền, sền gàr tiah tơlir gròi sền ală cau krơi mŭt tàm xã nàng rơcang sơndră mờ kòp gơtờp. Bơdìh mờ broă tus bal sền gàr tàm ală anih, làng bol kis tàm xã bol añ khăt tàm bơta hìu nhă dê geh phe tă pơgồp phe, geh biăp tă pơgồp biăp kơnuh plai chi nàng dong kờl tus mờ ală tiah gơtìp kòp gam lơh jăt broă tam cah ngài mpồl bơtiàn jăt Chỉ thị sồ 16 bơh Thủ tướng Chính phủ dê”.

Pin dờn tàm bơta đơng lam bơh Đảng mờ Dà lơgar dê tàm broă lơh rcang sơndră kòp Covid-19 mờ nùs nhơm “Sơnrdă mờ kòp bè tam dră mơ bòl sò tơm”, mò Ramah Chứt (kòn cau Bahnar) ơm tàm ƀòn Thong A, xã Ia Hrú, kơnhoàl Chư Pưh, càr Gia Lai đơs: Tŭ kòp bơtờp, làng bol lơh jat niam nàng rcang sơndră kòp mờ làng bol lơh jat jơnau sồr 5K. Gơnoar atbồ xã, thôn kung sùm tơngkah làng bol tàm broă rcang sơndră kòp. Lang bol kơ̆p gơn kòp geh mhar jơh, làng bol geh bơtàu tơnguh lơh sa wơl. Añ kơ̆p kờñ jơh gùt jơi bơtiàn dùl nùs bal nàng kòp dờng mhar jơh. Kơ̆p kờñ làng bol he dê gam ơm tàm tiah kòp gàr niam ngan pràn kơl dang să jan.

Cau mblàng Ndong Brawl- K’ Hạnh