VOV4.K’ho- Bơta bơtơ̆t dơng dà gơtìp tơrlah, ờ kơl jăp mờ tìs mờ broă lơh gơtìp ờ kơl jăp bơtơ̆t dơng dà tàm càr Dak Lak gam geh uă ngan. Uă broă lơh tìs neh gơbàn tàm uă nam mơya ờ hềt geh bơsong, sơlơ lơh gơguh bơta di gơlan gơtìp aniai tàm kàl mìu càl dờng, pơhìn tus mờ bơta ờ do ờ dă ală tiah lơh sa mờ ƀòn ơm kis tàm tiah đah jum.

Tơnơ̆ mờ ờ uă dơ̆ mìu bồ kàl, dà tàm tơnao dà lơh bơtơ̆t rơbòng dà Ea Tul 1, xã Băng Adrênh, kơnhoàl Krông Ana, càr Dak Lak neh mờr lìu bơtơ̆t. 350 rơbô khối dà bơh tiah đah tô dà gơs bơta ờ sŭk bơh uă hìu làng bol kis gùt dar tiah do tài bơtơ̆t dơng dà gam tàm mpồl di gơlan ờ kơl jăp tai.

                            Tờ tơnao tơn tềng jơng bơtơ̆t rơbòng dà Ea Tul 1, kơnhoàl Krông Ana

Sơlơ ờ sŭk ngan rơlao, tŭ geh 2 tơnao dơng dà, geh tờ tơn tềng jơng bơtơ̆t. Dùl nă cau kis tềng gah tơnao dơng dà lơh bơtơ̆t rơbòng dà pà gĭt, tàm bơta mìu dờng mờ jŏ ngai, jơng bơtơ̆t gơtìp gơmŭt uă dà, bàr tơnao do di gơlan lơh tơnao dơng dà bơh bơtơ̆t rơbòng dà gơtìp tơrlah, gơs dà cò, lơh aniai tus tàm tiah hờ đah jum: “Tơnao dà hơ̆ den cau ai ù nàng tờ tơn tềng jơng bơtơ̆t hơ̆, kơrnoăt bơh adăt ù tiah, bơtơ̆t dơng dà kung ờ ai broă lơh do. Bi lơi ai ù, bi lơi lơh ờ di mờ adăt boh lam den pal dờp kơnòl tềng đăp mờ adăt boh lam. Tài broă do ngòt rơngơ̆t ngan tus mờ làng bol lơh broă sa mờ ơm kis, uă ù dờng ơnàng, bơtơ̆t do ờ gĭt tơrlah tàm tŭ lơi”.

Ồng Nguyễn Đức Phú, Kuang atbồ tàm kơnhoàl Krông Ana – bơh Công ty TNHH MTV atbồ broă lơh bơtơ̆t rơbòng dà càr Dak Lak pà gĭt, mpồl atbồ 14 tơnao dơng dà mờ 1 bơtơ̆t dơng dà, tàm hơ̆ geh tơnao dơng dà Ea Tul 1. Broă tờ tơnao tơn tềng đơm jơng bơtơ̆t neh geh mpồl gŏ mờ yal mờ gơnoar atbồ tàm do. Mơya, tìs do kung gam geh tàm tŭ bơtơ̆t gam ờ kơl jăp tai. Ồng Phú kung pà gĭt, broă tìs lơh gơtìp ờ kơl jăp bơtơ̆t dơng dà tàm kơnhoàl kung geh uă, mờ broă bơsong ờ pràn gam lơh khà dơ̆ tìs ngai sơlơ gơguh: “Bol añ neh dan uă, gơlơh bè jơh ală tơnao dơng dà tàm kơnhoàl, mơya broă tus bal sền gròi bơh gơnoar atbồ ờ hềt nền nòn. Geh ală broă bol añ yal neh jŏ ngan, geh tŭ bơh 2 tus 3 dơ̆ mơya kung ờ hềt gŏ geh ai wơl bè ờs broă lơh den lơh làng bol ờ sền gròi, hìu A lơh gơtùi den hìu B kung lơh gơtùi sơl. Ờ bơsong nền nòn den làng bol pơn jăt tai tờ, cau do tus cau ndai”.

                          Geh uă bơtơ̆t dơng dà tàm càr Dak Lak neh gơtìp ờ kơl jăp mờ di gơlan gơtìp aniai

Tàm gùt càr Dak Lak, broă tơnao dơng dà gơtìp ờ kơl jăp, tìs mờ bơta ờ do ờ dă kung geh uă. Ồng Trịnh Quốc Bảo, Kuang atbồ anih atbồ broă lơh mờ cơ điện, Công ty TNHH MTV atbồ broă lơh bơtơ̆t rơbòng dà càr Dak Lak pà gĭt, tàm ală broă gơtìp tìs, sơgràm mờ công ty gŏ, geh ală broă lơh neh geh gơnoar atbồ tàm ală tiah ai sră dờp gơnoar ngui ù. Mờ kung ndrờm bè ală bơta lơi neh gơtìp tàm kơnhoàl Krông Ana sơl, broă bơsong lơyài ală broă sơgràm-aniai bơtơ̆t tơnao dơng dà, ngai sơlơ lơh ală broă lơh do gơtìp ờ kơl jăp tai: “Tŭ do, broă sơgràm jăt gah broă sền gàr broă lơh gam gơtìp kal ke ngan, mờ geh uă bơta ngan. Is ngan geh ală broă lơh gơnoar atbồ tàm ală tiah neh ai sră ngui ù tàm bơta geh broă lơh bơtơ̆t rơbòng dà, bè ai sră ngui ù tàm tơnao dà ha là ai tơn sră ngui ù hờ đang bơtơ̆t, ha là rềp tềng jơng bơtơ̆t. bơta do tìs mờ ală kơrnoăt tàm adăt bơtơ̆t rơbòng dà, mờ ală kơrnoăt ndai gơrềng bal. Kờñ lơh niam wơl, lơh kơl jăp wơl ha là prăp dà den làng bol ờ ai, lơh gơtìp tam phà. Den tàng, kung dan mờ ală anih lơh broă geh gơnoar pal geh broă bơsong kal ke do bol añ in".

Gùt càr Dak Lak tŭ do geh 624 nơm tơnao dơng dà, tàm hơ̆ geh 14 tơnao dơng dà hìu măi pờ tơlĭk ồs đèng, 610 tơnao dơng dà lơh bơtơ̆t rơbòng dà. Ồng Nguyễn Hoài Dương, Kuang atbồ Sở Nông nghiệp mờ Phát triển Nông thôn càr Dak Lak pà gĭt, càr ai geh 100 broă lơh tơnao dơng dà neh gơtìp tơrlah, tàm hơ̆ geh 12 broă lơh di gơlan gơtìp tơrlah tàm kàl mìu càl dờng nam do. Uă bơtơ̆t bơh ală tơnao dơng dà gơtìp tơrlah, siar uă ngan gơmŭt tàm bơtơ̆t, gơtìp tơrlah tàm dơlam bơtơ̆t. Tàm hơ̆, broă ờ kờl jăp, tơrlah tàm ală tơnao dơng dà gơwèt broă atbồ bơh ală công ty kơphe gơwèt Tổng Công ty kơphe Việt Nam geh sền là uă ngan. Mơya, tài khà priă bơh càr ờ uă, càr kờñ geh broă dong kờl bơh dà lơgar hơ̆ sồng gơtùi geh bơsong bơta do: “Tŭ do, tơnơ̆ mờ tơngai ngui neh jŏ den geh uă broă lơh neh gơtìp ờ kơl jăp, tơrlah, di gơlan gơtìp tơrlah uă ngan tàm kàl mìu càl dờng. Do là broă dờng ngan, tàm tŭ hơ̆, khà priă bơh càr gam gơtìp kal ke. Kung dan Dà lơgar sền gròi ngan, bơcri priă ai ală khà priă nàng lơh kơl jăp wơl ală bơtơ̆t dơng dà neh ờ kơl jăp. Dơ̆ bàr, kung dan Bộ Nông nghiệp mờ Phát triển Nông thôn đơng lam Tổng Công ty kơphe Việt Nam pal jào ală tơnao dơng dà bơh ală công ty kơphe gam atbồ nàng càr in sền wơl, lơh kơl jăp wơl nàng ai tàm broă atbồ, lơh broă, gàr niam ờ do ờ dă mờ di pal mờ ală kơrnoăt tŭ do dê”.

Ală bơta lơi gam gơlĭk geh tàm càr Dak Lak pà gŏ, broă kes priă ờ geh uă, ờ tơl priă lơh kơl jăp, mìng là nggùl tơngu me lơh uă tơnao dơng dà tàm càr Dak Lak gơs ală bơta ngòt rơngơ̆t, gam kơ̆p gơtìp bơta aniai. Nggùl tơngu me gam tai là broă atbồ, bơsong tìs ờ nền nòn tàm càr. Mờ tàm nggùl tơngu me tai, càr Dak Lak bañ kơ̆p gơn broă dong kờl bơh Dà lơgar. Càr rơcang lài, lơh ngan bơsong tìs, sơgràm broă lơh jăt gah bơtơ̆t dơng dà, kung dong kờl ală broă lơh do geh kơl jăp mờ prăp dà geh cồng nha rơlao.

Cau mblàng Ndong Brawl