VOV4.K’ho- Tàm tiah sền gàr rơwas càr Dăk Lăk, tŭ do geh git nđờ jơ̆t khối dơm chi ờ git loh tiah kơl, neh geh tơrgùm tàm bă ù mờ anih lơh broă do gam lơh rơndăp broă lơh wàng rơwas. Dơm chi di mờ adăt boh lam bơh broă tam gơl brê lơh rơndăp broă ờ hềt geh pơn diang jơh, dơm chi ờ di mờ adăt boh lam den geh bal tơn tềng gah, ờ loh làng mờ gơtìp ờ bè ờs ngan. Anih lơh broă sền gàr brê tàm do gam bơyai lơh lùp sền mờ geh tơngŏ gơtìp tìs gơbàn tàm do.

Tiah tơrgùm dơm chi ờ di mờ adăt boh lam mìng ngài mờ hìu lơh broă Tiah sền gàr rơwas càr Dăk Lăk di pơgăp 1 kơi sồ, tềng gah dùl tiah sền gàr brê mờ geh tơn tềng gah gùng. Ală dơm chi dờng, dềt gam tơrgùm uă ngan tàm dùl bă ù brê neh gơtìp mus kơl, tềng cồng bơh tơl dơm chi, ală tềl sề rơn đòt gam pa ngan, geh ờ uă dơm chi gam gơlik cài mờ anih lơh broă sền gàr brê neh tŏp ƀàng kì sền gròi dơm chi. Dơm chi tơrgùm tàm do geh uă bơta bè căm xe, crĭ, klòng mờ uă bơta dờng, dềt krơi is, geh uă ngan bơh 20 tus 30 phơng.

                Ƀlàng tơrgùm dơm chi tàm bơnah ù tiah sền gàr rơwas gơwèt Khoảnh 2, Tiểu khu 462

Jăt broă sền gròi, tàm do geh 4 ƀlàng rềp bal mờ ƀlàng tàm gùl bơh ù tiah lơh Anih sền gàr rơwas càr Dăk Lăk, gơwèt Khoảnh 2, Tiểu khu 462, gùt dar gam là brê sar chi che hòn is. Cong tê tềng ƀlàng tơrgùm dơm chi ờ di mờ adăt boh lam, dùl nă kuang bàng lơh broă tàm Tiah prăp gàr rơwas càr Dăk Lăk pà git, tàm tiah do, anih do gam lơh rơndăp broă lơh wàng rơwas. Mơya, ờ git bè lơi lah gơlik geh ală ƀlàng tơrgùm dơm chi ờ di mờ adăt boh lam tơn tềng bă ù do.

Ồng Huỳnh Trung Luân, Kuang atbồ Tiah sền gàr rơwas càr Dăk Lăk yal, rơndăp broă lơh wàng ròng rơwas geh càr kĭ tàm bă ù ơnàng 3 lồ 2 sào, geh ai mus kơl jơh chi che. Broă kơl chi tàm tiah lơh rơndăp broă geh broă sền gròi bơh Mpồl sền gàr brê kơnhoàl Buôn Đôn, broă pơgồp bal bơh Anih do mờ neh lơh gơs broă kơl chi tàm nhai 6 nam 2021. Tơn jơh broă tơrgùm dơm chi geh 152 khối chi ală bơta mờ neh geh Sở Tài chính càr Dăk Lăk tăc jơh tàm nhai 6 nam 2021 lài do. Tŭ do mìng gam 10 khối dơm chi ală bơta geh anih kơl ờ hềt pơn diang jơh, gam tàm ƀlàng lơh rơndăp broă lơh wàng rơwas.

                    Tàm tiah do, tiah sền rơwas càr Dăk Lăk gam lơh rơndăp broă lơh wàng rơwas

Ồng Huỳnh Trung Luân gơlơh ni sơna ngan tŭ bồ nhai 7 nam 2021, ală anih lơh broă geh gơnoar gŏ ƀlàng tơrgùm dơm chi ờ di mờ adăt boh lam geh tơn tàm tiah mờ Tiah sền gàr rơwas lơh rơndăp broă. Jăt kuang atbồ tiah sền gàr rơwas yal, anih do geh jào bă ù brê mìng geh 200 lồ, hìu lơh broă geh lơh tơn tàm bă ù do mờ geh tus 4 nă cau lơh broă sền gàr brê, ơpah tai 2 nă cau kis tàm do tus bal lơh broă, sùm tàm uă nam tàm anih do ờ gơtìp broă mus kơl chi brê lơi. Broă gŏ ƀlàng tơrgùm dơm chi ờ di mờ adăt boh lam geh gŏ di tàm tŭ anih lơh broă do lơh jăt rơndăp broă mờ 4 nă cau lơh broă sền gàr brê neh lòt dong kờl rơwas tàm càr Dăk Nông. Broă gơtìp neh rơlao 2 nhai, mơya anih do ờ hềt geh jơnau yal tài Mpồl sền gàr brê kơnhoàl gam bơyai lơh lùp khào. Bè broă geh pin pơrdah sơgràm broă lơh rơndăp broă nàng lơh di pal tơn ală dơm chi ờ di mờ adăt boh lam. Ồng Huỳnh Trung Luân đơs là: “Jơnau đơs bè hơ̆ mơ, ờ hềt geh cau lơi gơtùi đơs ngan broă do. Bol añ là cau tờm brê, hơ̆ là jơnau đơs bơh bơdìh, să tờm bơh cau ndai dê. Bơh tŭ hơ̆ tus tŭ do, bol añ sùm pơgồp bal sền gròi nền nòn tàm tiah do, nàng bal mờ anih lơh broă lùp khào sền gròi gam neh tìs, gờñ ai broă di nàng bơsong, tài bol añ git là lơh broă prăp gàr, jơnau git wă uă ngan bè broă sền gàr brê”.

Dơm chi tơrgùm tàm do geh uă bơta tàm hơ̆ geh căm xe, crĭ, klòng geh uă bơta dờng, dềt, geh uă ngan là bơh 20 tus 30 phơng

Mò H’ Lan Niê Buôn Dap, Kuang atbồ mpồl sền gàr brê kơnhoàl Buôn Đôn pà git, bơh broă lùp sền ing, geh tus 27 khối dơm chi ală bơta geh gŏ neh tơrgùm tàm ƀlàng anih sền gàr rơwas lơh jăt broă tam gơl brê lơh rơndăp broă lơh wàng rơwas mờ jơh ală dơm chi do ờ geh tàm khà dơm chi bơh broă lơh rơndăp broă. Bơh broă sền gròi ờ uă tờm chi mờ gơl chi là di pal ngan tàm ƀlàng tơrgùm dơm chi do, mơya geh ờ uă dơm chi ờ di pal, di gơlan là geh kơl bơh tàm tiah ndai mờ cèng tơrgùm tàm tiah do. Jăt mò H’ Lan đơs, broă do ờ di anih prăp gàr rơwas gŏ mờ geh mpồl dềt sền gàr brê pơgồp bal mờ Mpồl sền gàr brê kơnhoàl Buôn Đôn mờ Mpồl sền gàr brê nrờn sồ 1 gŏ. Broă lùp khào geh bơyai lơh tàm 2 nhai kung ờ hềt gơs là tài pal kơ̆p cồng nha sền nàng git bơh anih lơh broă geh gơnoar, mơya tŭ do neh mờr gơs sră nggal. Broă do geh tơl cơng tàng nàng kŭp glài, tơl khà chi nàng yă lơh glài hình sự nàng jào sră nggal tus mờ anih lơh broă kuang àng nàng pơn jăt tai lùp khào lơh loh. Mò H’ Lan đơs, tàm ală bơta lơi, anih sền gàr rơwas pal dờp kơnòl lài jơh tài lời broă do gơtìp tơn tàm ù tiah bơh anih lơh broă do: “Tŭ do den ờ hềt gŏ cau kơl khà dơm chi do, den tàng yă broă do gơs den geh tam gơl ai kuang àng nàng kuang àng pơn jăt tai lơh. Bŭ lah bè lơi, gơtìp tơn tàm bă ù mờ cau tờm brê gam atbồ den kơnòl tềng đăp măt pal là cau geh dà lơgar jào atbồ, sền gàr brê hơ̆ lài. Cau tờm brê pal dờp kơnòl sơnrờp ngan, adăt sền gàr brê neh geh cih loh bloh”.

Mờ bă brê sar, mpồl sền gàr brê pràn ngan tàm ală mpồl cau tờm brê tàm Tây Nguyên dê, 6 nă cau sền gàr 200 lồ brê, sùm uă ngan Anih sền gàr rơwas càr Dăk Lăk ờ gŏ dơ̆ mus kơl chi brê lơi, kơl chi ờ di mờ adăt boh lam lơi. Mơya, bơh tŭ anih lơh broă do lơh jăt rơndăp broă tam gơl brê nàng lơh wàng rơwas den gơtìp geh git nđờ rơhiang dơm chi ală bơta, mờ khà tus 27 khối geh tơrgùm tơn tàm ƀlàng tàm tiah lơh rơndăp broă, rềp tơn mờ ală dơm chi di mờ adăt boh lam ờ hềt geh pơn diang ntrờn. Di lah bơrlŭ bal ală dơm chi do den gơs biàng tàm bơrlŭ bal uă ngan, ƀuơn ngan pơn diang lik bơdìh brê. Khà dơm chi ờ di mờ adăt boh lam do ờ tŭ lơi dềt, broă tơrgùm pal roh uă ngan tơngai, pal geh rơndeh dờng, mơya cau tờm brê gam tàm tơngai lơh jăt rơndăp broă; uă kuang bàng, cau lơh broă sùm mŭt tàm tiah do mờ ờ gŏ sơl. Ală bơta tơngŏ ni sơna do pal geh anih lơh broă geh gơnoar càr Dăk Lăk mờ kơnhoàl Buôn Đôn lơh loh.

Cau cih Công Bắc-Cau mblàng Ndong Brawl