VOV4.K’ho- Tàm dơ̆ pơrjum Văn phòng Thường trực Mpồl đơng lam dà lơgar bè rơcang sơndră trồ tiah lơh aniai bè broă sơndră mờ mìu nhàc geh lơh drim ngai 07/10 tàm Hà Nội, ồng Trần Quang Hoài, Phó Kuang atbồ Mpồl đơng lam dà lơgar bè rơcang sơndră trồ tiah lơh aniai đơs loh, ală tiah pal bơt bơtàu broă rơndap lơh mùl màl ai broă ntrờn làng bol, ờ mìng gàr niam ờdo ờdă rơcang sơndră trồ tiah lơh aniai mờ gam rơcang sơndră kòp Covid-19 tai.

Jat hơ̆, ală tiah pal jal mhar hòi ơhò, plung lik bơh tiah ngòt rơngơt bơh mìu nhàc dê digơlan pràn gơs càl rbut dờng; gròi sền nền nòn broă gơlik geh bơh mìu nhàc dê mờ rơcang lài ală rơndap broă bơsong tŭ geh broă ờ niam gơlik geh. Tàm rơndap broă ntrờn làng bol, ală tiah pal sền gròi pleh tơn tàm ƀòn lơgar. Dơ̆ mìu càl rbut do digơlan gơlik geh bơta tam cah is tài bơh ngơr bam, bè hơ̆ den tàng pal gàr tơl kòi phe, phan sa, dà hùc ai làng bol in, pleh bơta tơnơ̆ tŭ gơlik geh trồ tiah lơh aniai den làng bol gơ ơm tàm bơta ờ tơl phe sa.

Cau mblàng K’Duẩn