VOV4.K’ho- Mho ngai 08/7, Bộ Giao thông mờ Vận tải geh sră sơrbac mhar pơyua tus Ủy ban Nhân dân càr Lâm Đồng, Cục Gah rơndeh par Việt Nam mờ Cục Lơh sơnơm gùng lòt pơndiang phan in bè broă ơm ing ală rơndeh par lòt bơh ƀòn dờng Hồ Chí Minh tus Lâm Đồng mờ sơlơ̆u wơl. Tềng đăp bơta gơbàn kal ke bơh kòp dờng Covid-19 dê, ală cau bơtờp mờ virus Sars CoV-2 tàm Lâm Đồng ndrờm geh anih lơh bơtờp bơh ală cau tus mờ rê bơh ƀòn dờng Hồ Chí Minh.

Ủy ban Nhân dân càr Lâm Đồng neh sồr ală anih lơh broă geh gơrềng lơh jăt ơm ing ală rơndeh pơndiang năc gùng ù bơh ƀòn dờng Hồ Chí Minh tus Lâm Đồng mờ sơlơ̆u wơl. Tàm tŭ hơ̆, gùng rơndeh par lòt rê đah 2 tiah do kung gam lơh broă bè ờs sơl bal mờ 5 dơ̆ par pah poh, lơh gơrềng mờ lơh gơlik bơta kơn jơ̆ ngan tus broă lơh gròi sền, rơcăng sơndră kòp Covid-19 in. Den tàng bè hơ̆, Bộ Giao thông mờ Vận tải neh ring bal gùng dà bè broă ơm ing ală rơndeh par pơndiang năc lòt bơh ƀòn dờng Hồ Chí Minh tus Lâm Đồng mờ sơlơ̆u wơl jăt jơnau dan bơh Ủy ban Nhân dân càr Lâm Đồng dê. Tơngai lơh jăt sră nggal do kờp bơh tŭ 0h mang ngai 09/7.

Cau mblàng Lơ Mu K’Yến